खोज

पाल्पा, २६ वैशाख ।

जिल्लाका व्यावसायिक पशुपालक कृषकहरूलाई लुम्बिनी प्रदेश सरकारले लागु गरेको व्यावसायिक गाईभैंसी फार्मले अवलम्बन गर्नुपर्ने पशु कल्याण मापदण्ड २०८० का बारेमा अभिमुखिकरण गरिएको छ । भेटेरिनरी अस्पताल तथा पशु सेवा विज्ञ केन्द्र पाल्पाले मापदण्ड बारेमा जानकारी गराउँदै व्यावसायिक फार्महरूले पशु कल्याण मापदण्ड लागु गर्न अभिप्रेरित गरिएको छ । बरिष्ठ पशु चिकित्सक डा. नविन बस्यालले मापदण्ड रहेका व्यवस्था जस्तै पशुपालन सम्बन्धी आधारभूत व्यवस्था, पशु कल्याण सम्बन्धी व्यवस्था र गाईभैंसी प्रति हुने निर्दयी व्यवहारका बारेमा सहजिकरण गरेका थिए ।

पशुपन्छी तथा मत्स्य विकास निर्देशनालयका निमित्त निर्देशक डा. प्रवेश सिंह कुँवरले गाईभैसी पालक कृषकहरुले पशु कल्याण मापदण्ड लागु गरेमा पशु उत्पादन बृद्धि हुने, स्वस्थकर उत्पादनले बजारसंग प्रतिस्पर्धा गर्न सहज हुने भएकाले मापदण्ड लागु गर्न प्रोत्साहन गरिएको बताए । विज्ञ केन्द्र पाल्पाका निमित्त प्रमुख दुर्गा प्रसाद बस्यालले पशु कल्याण मापदण्ड लागु गर्ने बिषय स्वेच्छिक रहेकाले व्यावसायिक कृषकहरूले चाहेको खण्डमा अनुमगन समितिले मुल्याङकन गरेर प्रमाणपत्र प्रदान गरिने बताए ।

कार्यक्रममा डा. चन्द्र बहादुर राना र अधिकृत युवराज ज्ञवालीले प्रदेश सरकारले लागु गरेको मापदण्डलाई अभियानकै रुपमा ग्रामीणस्तरका पशुपालक कृषकहरूसम्म पुर्याउन जरुरी रहेको बताए । उनीहरूले जानेर वा नजानेर पशुपालक कृषकहरूले पशुप्रति निर्दयी व्यवहार गर्ने गरेकाले यसलाई न्युनीकरण गर्न आवश्यक रहेको बताए । सहभागीहरुले पशुले उत्पादन दिन छोडेपछि त्यसको व्यवस्थापन गर्ने बिषय मापदण्डमा उल्लेख नभएको, पशु बीमा कार्यक्रम प्रभावकारी हुन नसकेको, पशुलाई आवश्यक पर्ने खोप र औषधि समयमा उलपब्ध हुन नसेकेको जस्ता समस्या उठाएका थिए ।