खोज

नेपालका तराईका जिल्लामा अत्याधिकरूपमा गर्मी बढेको छ । बिहानैदेखि चल्ने तातो हावा लु सहितको गर्मीले तराईको जनजीवन अस्तव्यस्त बनेको छ । नेपालको सवैभन्दा बढी गर्मी हुने भैरहवामा पछिल्लो एक सातायता ४० देखि ४३ डिग्री माथि तापक्रम पुगेको छ । तातो हावा सहितको लु चल्दा जनजीवन प्रभावित मात्रै भएको छैन, बालबालिकादेखि वृद्ध वृद्धा विभिन्न फ्लुबाट प्रभावित भएका छन । तातो हावाहुरी तथा अत्यधिक गर्मीले गर्दा मजदुरी गरेर जीविकोपार्जन गर्नेहरू अझै बढी प्रभावित भएका छन । लामो समयदेखि खडेरी परेसँगै आगलागीका घटना बढेका छन् । रूपन्देहीका विभिन्न स्थानमा लागेको आगलागीबाट ८७ घर पूर्ण रूपमा क्षति पुगेको रूपन्देही प्रशासनले जनाएको छ । ८७ घरपरिवारका ५०४ जना घरबारविहीन हुन पुगेका छन् । उनीहरूलाई राहत र पुनस्र्थापनाको खाँचो छ । एकातिर तातो हावा सहितको लु चल्दा जनजीवन नराम्रोसंग प्रभावित भएको छ । दिउँसोमा बाहिर निस्कन सक्ने अवस्थासम्म छैन । त्यसैमा लामो समयदेखि पानी नपरेपछि वायुमण्डल दूषित भई मानिसमा विभिन्न खालका समस्याहरू देखिएका छन ।

अस्पतालमा रुघा, खोकी, ज्वरो, झाडा पखाला लगायत विभिन्न समस्याका विरामीको संख्या बढेको छ । स्वास्थ्यकर्मीहरूले तातो हावाका कारण धेरै थकाई लाग्ने, कमजोरी हुने, बढी तिर्खा लाग्ने, टाउको दुख्ने, खुट्टा बाउँडिने, चक्कर लाग्ने, बेहोस हुने जस्ता समस्याहरू देखिएको हुँदा सजक रहन आग्रह गरेका छन् । त्योसंगै यही बेला मौसम परिवर्तनको समय भएकोले अनेकथरी संक्रामक रोगहरू देखापरेका छन । ठिक यही बेला मौसमी फ्लुका कारण राजधानी काठमाण्डौंदेखि तराईका जिल्ला प्रभावित भएको हामीले विर्सिसक्यौं । जे भएपनि प्रि मनसुन सुरु भएको छ । यो बेला पानी पर्न सुरु हुनेपर्ने हो तर दुई वर्ष अघि ठिक यही बेला इन्फ्लुएन्जा (फ्लु) भाइरसका कारण तराईमा बिरामीको संख्या बढेको थियो । धेरैजसोमा ‘ए’, ‘बी’ र ‘सी’ टाइपको फ्लुको संक्रमण देखिएको थियो । काठमाडौंका केही अस्पतालहरूका अधिकांश आईसीयु कक्ष फ्लु र निमोनियाका बिरामीले भरिएको थियो । ठिक यसैगरी अहिले कोरोनाको फ्लूले समस्या निम्त्याएको छ ।