खोज

सुनवल, १७ पुस ।

पुर्व राजा ज्ञानेन्द्र शाहले पश्चिम नवलपरासीको सरावल ७ मा रहेको बर्दघाटे कालिका मन्दिरमा पुजाआजा गरेका छन् । मंगलबार दिउँसो भारतीय सिमा नजिकै रहेको मन्दिरमा आई पुर्व राजा शाहले विधिपुर्वक पुजाआजा गरेका हुन् । सो क्रममा राष्ट्रिय प्रजातन्त्र पार्टीका नेता कार्यकर्ता तथा शाहका शुभेच्छुकहरुको बाक्लो उपस्थिति रहेको थियो ।

पुर्वराजाको आगमनका क्रममा राजावादीहरुले हाम्रो राजा हाम्रो देश प्राण भन्दा प्यारो भन्दै नाराबाजी गरेका थिए । शाहले पुजाआजा पछि मञ्चमा पुगेर सम्मान ग्रहण गरेका थिए । उनलाई राप्रपाका उपाध्यक्ष तथा प्रतिनिधि सभा सदस्य धुव्र बहादुर प्रधानले मायाको चिनो प्रदान गरे ।

हात हल्लाएर उपस्थित शुभेच्छुकलाई अभिवादन गरेका शाहले सो क्रममा केही बोलेनन् । प्रतिनिधि सभा सदस्य प्रधानले पुर्वराजाको भ्रमणले यस क्षेत्रको महत्व झनै बढेर गएको बताउँदै बर्दघाटे कालिका मन्दिरको पनि विकास र प्रर्वद्धन हुने विश्वास व्यक्त गरे । प्रधान केहि दिन देखि पुर्वराजाको भ्रमणको तयारीमा खटिदै आएका थिए । सो क्रममा स्थानीय तहले समेत पुर्वराजालाई मायाको चिनो प्रदान गरेका थिए । स्थानिय तहको तर्फ देखि मायाको चिनो प्रदान गर्नेमा रामग्राम नगरपालिकाका कार्यवहाक नगर प्रमुख सम्झना चौधरी, सरावल वडा नम्बर ३ का वडाअध्यक्ष फिरंगि चौधरी लगायत रहेका थिए ।

बर्दघाटे कालिका मन्दिर यस क्षेत्रकै पुरानो मन्दिरको रुपमा रहेको छ । सो मन्दिर कहिले स्थापना भयो भन्ने एकिन नभएपनि एक सय वर्ष भन्दा पनि पुरानो रहेको मन्दिरका महन्थ सुदामा दासले जानकारी दिए । उक्त मन्दिरमा चैत्र नवमीमा भव्य मेला लाग्ने गर्दछ । मन्दिरमा भाकल गरे पुरा हुने जनविश्वास रहेको छ । भाकल पुरा भएकाहरुले मन्दिरमा आई हात्तिको प्रतिमा स्थापना गर्ने गर्दछन् ।

भैरहवालाई मुकाम बनाएर दुई साता देखि यस क्षेत्रमा रहँदै आएका पुर्व राजा आज पुनः भैरहवा फर्किएका छन् । उनलाई १९ गते भैरहवामा नागरिक अभिनन्दन गर्ने कार्यक्रम रहेको छ । विशेषगरी व्यक्तिरुपमा भेटघाटमा पुर्व राजा सक्रिय देखिएका छन् ।