खोज

दाङ, १३ असोज ।

दाङ जिल्ला उद्योग वाणिज्य संघको नयाँ नेतृत्व चयनका लागि मतदान सम्पन्न भएको छ । दाङ जिल्ला उद्योग वाणिज्य संघको आगामी कार्याकालका लागि भएको निर्वाचनमा ७० प्रतिशत मत खसेको छ । शनिबार भएको निर्वाचनमा २ हजार ३ सय ५७ जनाले मतदान गरेका निर्वाचन समितिले जनाएको छ । घोराही– १४ को सभा गृहमा बिहान पौने ९ बजेबाट मतदान कार्य शुरु भएको थियो । साँझ ५ बजेसम्म मतदान हुने भनिए पनि उक्त समयमा मतदान केन्द्रमा प्रवेश गरेका मतदातालाई मतदानमा सहभागी गराइएको निर्वाचन समितिका संयोजक निर्मल गौतमले जानकारी दिएका छन् । उक्त मतदानको मतगणना पनि राति ९ बजेपछि सुरु गरिने उनको भनाई छ । संघमा ३ हजार ३ सय ५८ जना मतदाता रहेका थिए ।

निर्वाचनका लागि २० पदमा ४० जनाको उम्मेदवारी परेको छ । अध्यक्ष पदमा वसन्त जोसी र रामप्रसाद पोख्रेल विच प्रतिस्पर्धा रहेको छ । जोसी यसअघि संघको उद्योग उपाध्यक्ष हुन् भने पोख्रेल वर्तमान कार्य समितिको वाणिज्य उपाध्यक्ष हुन् ।

जोसीको समुहबाट वरिष्ठ उपाध्यक्षमा नरेशकुमार श्रेष्ठ, उद्योग उपाध्यक्षमा भरतप्रसाद रेग्मी, वाणिज्य उपाध्यक्षमा लिलाराम खड्का, महासचिवमा महेन्द्र बुढाथोकी, सचिवमा विकास वली, कोषाध्यक्षमा जगतप्रसाद आचार्य र सह कोषाध्यक्षमा माधव खनालको उम्मेदवारी रहेको छ । उद्योग सदस्यमा विक्रम राना, महिला सदस्यमा लिला नेपाली, वस्तुगत सदस्यमा विष्णुप्रसाद रिजाल, एशोसियट सदस्यमा युवराज पोख्रेल रहेका छन् ।

खुला सदस्यमा रुद्रबहादुर जैसी, दिपक पण्डित, निमबहादुर बुढाथोकी, युवराज पन्त, रामप्रसाद पोख्रेल, पुष्करराज न्यौपाने नोर्वु तामाङ, र सुरज बुढाथोकीले उम्मेदवारी दिएका छन् । पोख्रेलको टिमबाट वरिष्ठ उपाध्यक्षमा दिपेन्द्रपुन मगर, उद्योग उपाध्यक्षमा धु्रबकुमार गहतराज, वाणिज्य उपाध्यक्षमा राजभक्त राना, महासचिवमा शालिकराम खनाल, सचिवमा भिमसेन डिसी, कोषाध्यक्षमा प्रेमबहादुर पुन, सह कोषाध्यक्षमा यादवबहादुर श्रेष्ठको उम्मेदवारी परेको छ । उद्योग सदस्यमा सन्तोष नेपाली, महिला सदस्यमा देवकला वस्नेत, वस्तुगत सदस्यमा ओमप्रकास पोख्रेल, एशोसियट सदस्यमा गणेशप्रसाद दाहालको उम्मेदवारी परेको छ ।