खोज

बुटवल, १० असोज ।

रुपन्देहीको पुरानो मध्येको एक उद्योगी, ब्यवसायीहरुको संस्था बुटवल उद्योग वाणिज्य संघमा चुनावी सरगर्मी बढेको छ । संघको ७० औ साधारण सभा तथा २५ औ अधिवेशनको असोज १९ देखि २२ गते मिति घोषणा भएसंगै चुनावी चहलपहल शुुरु भएको हो । संघको नयाँ नेतृत्वका लागि पुर्व अध्यक्षहरुको बहुमत साथसहित दिनेश प्रसाद श्रेष्ठको टिम एकातिर मैदानमा छ भने उनका बिरुद्ध हरि प्रसाद अर्यालको कडा टिम मैदानमा उत्रेको छ । अघिल्लो पटक अध्यक्ष उज्जल कसजुसंग अर्याल पराजित भएका थिए । हरि अर्याल यसपटक बलियो टिमसहित मैदानमा उत्रेका छन । संस्थापन टिमका रुपमा उत्रेका श्रेष्ठको टिममा वरिष्ठ उपाध्यक्ष टंक गैरे, उद्योग उपाध्यक्ष नविन श्रेष्ठ, वाणिज्य उपाध्यक्ष विमल भट्टराई, महासचिव बाबुराम बिक, सचिव प्रतीक पोखरेल, कोषाध्यक्ष प्रकाश श्रेष्ठ र सहकोषाध्यक्षमा जाकिर हुसैनको नाम चर्चामा रहेको छ । यता अर्यालको टिम पनि प्रचारमा जुटेको छ । अहिलेसम्म वरिष्ठ उपाध्यक्ष टंक गैरे र वाणिज्य उपाध्यक्ष विमल भट्टराई दुवै टिममा नाम आएको छ । अर्यालकै टिममा उद्योग उपाध्यक्ष सुरज भट्टराई, महासचिव मुक्ति अधिकारी, सचिव भेषराज गैरे, कोषाध्यक्ष वसन्त ढकाल, सहकोषाध्यक्ष धन कुमारीको नाम आएको छ ।

श्रेष्ठको टिममा दलीय रुपमा हेर्ने हो भने उम्मेदवारहरुमा नेपाली काँग्रेस पार्टीको बाहुल्यता छ । यता अर्यालको टिमका उम्मेदवारहरु भने राजनीतिक रुपमा काँग्रेस र एमाले मिश्रित देखिन्छ । अध्यक्ष, वरिष्ठ, वाणिज्य उपाध्यक्ष, महासचिव नेपाली काँग्रेस तथा उद्योग उपाध्यक्ष नेकपा एमाले निकट रहेका छन् ।

दुबै टिम पदाधिकारीहरुको टुँगो लगाएर सार्वजनिक गर्ने तयारीमा छन् । श्रेष्ठ आफु चार वर्ष सदस्य हँुदै वरिष्ठ उपाध्यक्ष पदसम्म संघमा योगदान दिएको हुँदा पनि स्वतः नेतृत्वको लागि तयारी गरेको बताउँछन् । ब्यवसायीको समस्या बुझेर त्यसको निराकरणमा आफु सधै अगाडि रहेको उनी दाबी गर्छन् । यता अर्का उम्मेदवार अर्याल पनि संघमा लामो समय योगदान दिएर उपाध्यक्ष हँुदै काम गरेको अनुभवलाई नेतृत्वमा रहेर बुटवल बजारलाई गुल्जार गर्ने गरी योजना बनाउने संकल्प गर्छन् ।
संघमा ३३ वटा वस्तुगत उपसमिति रहेका छन् । उम्मेदवारी दिन उपसमितिमा अध्यक्ष र उपाध्यक्ष पदमा बसेर योगदान दिएकालाई प्राथमिकता दिंदै आएको छ । हाल ३ हजार पाँच सय सदस्य रहेकोमा यो वर्ष १ हजार ७ सय ७८ सदस्यहरुले मात्र नविकरण गरेका छन् ।

यस्तो छ टिम

अध्यक्ष दिनेश प्रसाद श्रेष्ठ
वरिष्ठ उपाध्यक्ष टंक गैरे
उद्योग उपाध्यक्ष नविन श्रेष्ठ
वाणिज्य उपाध्यक्ष बिमल भट्टराई
महासचिव बाबुराम बिक
सचिव प्रतीक पोखरेल
कोषाध्यक्ष प्रकाश श्रेष्ठ
सहकोषाध्यक्ष जाकिर हुसैन

अध्यक्ष हरि अर्याल
वरिष्ठ उपाध्यक्ष टंक गैरे
उद्योग उपाध्यक्ष सुरज भट्टराई
वाणिज्य उपाध्यक्ष विमलराज भट्टराई
महासचिव मुक्ति अधिकारी
सचिव भेषराज गैरे
कोषाध्यक्ष वसन्त ढकाल
सहकोषाध्यक्ष धन कुमारी खनाल