खोज

सुनवल, ४ असोज ।

नवलपरासीको सुनवल १२ भुमहीमा रहेको भुमही दुग्ध उत्पादक सहकारी संस्थाले दुध बिक्री गर्ने किसानहरुलाई झण्डै १७ लाख बराबर बोनस रकम वितरण गरेको छ । गत आर्थिक वर्षमा सहकारीमा दुध बिक्री गर्दै आएका ५ सय ७५ जना पशुपालक किसानहरुलाई वर्षभरी कुल ७ लाख ४७ हजार ९ सय ९४ लिटर दुध बिक्री बापत १६ लाख ८२ हजार ९ सय ८८ रुपैयाँ बोनस रकम वितरण गरेको छ । बिहीवार भुमहीमा आयोजित एक कार्यक्रमका बिच उत्पादनको आधारमा कृषक बोनस कार्यक्रम अन्तर्गत किसानहरुलाई बोनस बापतको चेक रकम हस्तान्तरण गरेको सहकारीका व्यवस्थापक अग्नीधर भुषालले जानकारी दिए ।

मंगलबार दश हजार माथि बोनस रकम प्राप्त गर्न सफल ४३ जना किसानलाई चेक हस्तान्तरण गरिएको छ भने बाँकी रकम संस्थाको कार्यालयबाटै उपलब्ध गराईने सहकारीले जनाएको छ । एक वर्षको अवधिमा ३९ हजार ६ सय ५ लिटर दुध बिक्री गरेका किसान चन्द्रमणि ढकालले सबैभन्दा बढी ८९ हजार १ सय १२ रुपैयाँ बोनस रकम पाउन सफल भएका छन् । ढकालले बोनस रकम पाएपछि खुसी व्यक्त गर्दै सबैभन्दा पिडामा किसान भएको बेला सहकारीले बोनस रकम वितरण गरेर केही भएपनि उत्प्रेरणा थपेको बताए ।

सुनवल १२ का वडा अध्यक्ष चुरामणि पौडेलले नगरपालिकाले किसानमैत्री बजेट बनाउनुपर्नेमा जोड दिए । अझै पनि किसानको हितमा बजेट आउन नसकेको भन्दै यस विषयमा नगरपालिकाको ध्यानआकर्षण गराए पनि सुनुवाई नभएकाले किसानहरु पनि सचेत हुुनुपर्ने पौडेलले बताए । वडा नम्बर ११ का अध्यक्ष कमल प्रसाद चुवाईले सुनवलमा स्थानीय तहको बजेट कृषिमा निकै कम भएको बताए । कम्तीमा पनि कुल बजेटको १५ प्रतिशत बजेट कृषिमा लगानी गर्नुपर्ने चुवाईको धारणा थियो ।

भेटेरेनरी अस्पताल तथा पशु सेवा विज्ञ केन्द्र परासीका सुरेश मिश्रले किसानलाई सरकारले अनुदानको माध्यमबाट सहयोग पुर्याउँदै आएको बताउँदै अनुदान प्राप्त गर्न योग्य बन्न किसानहरुलाई सुझाव दिए । सहकारीका उपाध्यक्ष तारादेवी भण्डारीले किसानले विभिन्न समस्याका बिच पनि उत्पादन बढाउन प्रयासरत रहेको बताउँदै गुणस्तरीय उत्पादनमा ध्यान दिनुपर्ने बताईन् । सो क्रममा किसानहरुले मल बिउको प्राप्तीमा कठिनाई भएको गुनासो गरेका थिए । भुमही दुग्ध उत्पादक सहकारीले किसानहरुलाई दुधको गुणस्तरको आधारमा ७५ देखि १ सय २० रुपैयाँ प्रतिलिटर रकम दिने गरेको छ । सोही आधारमा संस्थाले बोनस समेत बाँड्दै आएको छ ।