खोज

बुटवल, ३१ भदौ ।

हेटौडामा चिकित्सकमाथि भएको आक्रमणको विरुद्धमा देशभरका चिकित्सकहरु सेवा रोकेर आन्दोलनमा उत्रेका छन् । आइतबार लुम्बिनी प्रादेशिक अस्पताल परिसरमा आन्दोलनलाई समर्थन गर्दै नेपाल चिकित्सक संघ रुपन्देही शाखाका चिकित्सकहरु विरोध कार्यक्रमसहित धर्ना दिएका छन् । उनीहरुले स्वास्थ्यकर्मी कुट्न बन्द गर, सुरक्षाको ग्यारेन्टी गर लेखेका प्लेकार्ड सहित केहीबेर धर्ना दिए ।

कार्यक्रममा बोल्दै लुम्बिनी प्रादेशिक अस्पतालका मेसु डा. सुदर्शन थापाले विगतमा पनि यस्ता घटना घटिरहेको भन्दै कानुनी रुपमा ब्यवहारमा लागू नगरिंदा दोहोरिएको बताए । यस विषयमा सरकार गम्भीर हुनुपर्ने उनले बताए । पटकपटक घटना घट्ने तर सरकारले केवल प्रतिवद्घता मात्र जनाउन नहुने उनको तर्क छ ।

नेपाल चिकित्सक संघ रुपन्देही शाखाका सहकोषाध्यक्ष वर्षा थापाले चिकित्सकहरु आफ्नो हकहितका लागि एकजुट हुनुपर्ने बताईन् । संघका महासचिव डा. सन्तोष पोखरेलले क्लिनिकमा समेत कुनै काम नगर्न सुझाव दिए । आकस्मिक बाहेकका सबै सेवा बन्द हुने उनले बताए । चिकित्सकहरुको समस्यालाई आम नागरिकलाई बुझाउन जरुरी रहेको उनको भनाई छ ।

लुम्बिनी प्रादेशिक अस्पतालका वरिष्ठ चिकित्सक डा. नेत्र रानाले चिकित्सकहरुबीचमा रहेको विभेद हटाउन जरुरी रहेको बताए । सिनियर र जुनियरबीचको विभेद हट्न सके धेरै समस्याहरु समाधान हुने उनले दाबी गरे । मेडिकल अफिसरलाई समेत सदस्य बनाउन जरुरी रहेको उनले बताए । केन्द्रको निर्देशन अनुसार अघि बढ्ने उनले बताए । हाल संघमा ३० हजार चिकित्सकहरु आवद्घ छन् ।