खोज

बुटवल, १८ भदौ ।

नेकपा एमालेको लुम्बिनी प्रदेशको प्रथम अधिवेशनमा नेतृत्व चयन सर्वसम्मत गराउन नेताहरु आइतबार दिनभर र सोमबार बिहानसम्म प्रयास गरे । तर सर्वसम्मतको प्रयास असफल भयो । आइतबार उम्मेदवारी मनोनयनमा राधाकृष्ण कंडेल आफै गएर उम्मेदवारी दर्ता गराए भने अर्का प्रत्यासी हरि रिजाल उम्मेदवारी दर्ता गर्न गएनन् र उनको तर्फबाट अधिवेशन प्रतिनिधिले उम्मेदवारी दर्ता गराइदिए ।

उम्मेदवारी दर्ता भैसकेपछि रिजालले अधिवेशनमा सहभागी केही प्रतिनिधिसँग आफू परिवन्धमा परेको बताएका थिए । “उहाँको प्रस्तुती हेर्दा इच्छाविपरित नै उम्मेदवारी दिएको भन्ने बुझिन्थ्यो, म परिवन्धमा परें भनेर उहाँ स्वयंले भन्नुभएको थियो”–अधिवेशनमा सहभागी एक प्रतिनिधिले भने ।

स्रोतका अनुसार रिजाललाई अध्यक्षको उम्मेदवारीबाट पछाडि नहट्न केन्द्रीय सदस्यहरु भूमिश्वर ढकाल, शिवराज सुवेदी, चेतनारायण आचार्य लगायतका नेताहरुले दवाव दिएका थिए । “अधिवेशनमा सहभागी ती प्रतिनिधिले रिजालको भनाई उद्धृत गर्दै भने, “केन्द्रीय नेताहरुले हामीले जिताउँछौं, पछाडि नहट्नुस् भनेकाले परिवन्धमा परेर म उम्मेदवार बन्नु पर्यो ।”

आफै उम्मेदवारी दर्ता गर्न नगएपछि उहाँको चाहना विपरित नै उम्मेदवार बन्न लगाइएको पुष्टी हुने ती कार्यकर्ताले बताए । यसबारेमा प्रतिक्रिया लिन खोज्दा अध्यक्षका प्रत्यासी रिजालले भने फोन उठाएनन् ।

अध्यक्षका अर्का प्रत्यासी राधाकृष्ण कंडेलले लोकतन्त्रमा निर्वाचनलाई अन्यथा लिन नहुने बताउँदै स्वस्थ प्रतिष्पर्धाका माध्यमबाट आफूले जित हासिल गर्ने बताए । पार्टी अध्यक्ष केपी शर्मा ओलीले शनिबार साँझ नै दुवै नेतालाई बोलाएर सहमतिमा अघि बढ्न आग्रह गरेका थिए । उनले लुम्बिनीबाट प्रतिनिधित्व गर्ने शीर्ष नेतालाई पनि सहमतिमै नेतृत्व चयन गर्नेगरी पहलकदमी लिन आग्रह गरेका थिए । तर अध्यक्षको चाहना विपरित नेतृत्व चयनका लागि भने चुनाव नै हुने निश्चित भएको छ ।