खोज

बुटवल, १८ भदौ ।

नेकपा एमाले लुम्बिनी प्रदेश अधिवेशनको नेतृत्वका लागि सहमतिको प्रयास जारी राख्दै नेताहरुले निर्वाचनको तयारी सुरु गरेका छन् । तर सहमतिको सम्भावना टरेको छलफलमै सहभागी नेताले बताएका छन् ।

निर्वाचन समितिले सोमबार (आज) बिहान १० बजेसम्मका लागि उम्मेदवारी दर्ताको अन्तिम समय दिएको थियो। यसअघि आइतबार राति ९ बजेसम्म तोकिएको थियो । छलफलमा सहभागी नेताहरुले नै समय थप गर्न आग्रह गरेपछि निर्वाचन समितिले समय थप गरेको थियो ।

सोमबार १० बजेपछि उम्मेदवारी दर्ताको समय थप नगरी त्यसपछि उम्मेदवारी माथिको दाबी विरोध र फिर्ताको प्रक्रिया सुरु हुने गरी निर्वाचन कार्यालयले जनाएको छ । सोमबार बिहान ८ बजेसम्ममा अध्यक्षको लागि दुई जनाको उम्मेदवारी दर्ता भएको छ । अध्यक्षमा पाल्पाका राधाकृष्ण कँडेल र प्यूठानका हरि रिजालले आइतबार निर्वाचन समितिमा उम्मेदवारी दर्ता गराएका हुन् । कँडेल एमालेको लुम्बिनी प्रदेशको तदर्थ समितिका निवर्तमान अध्यक्ष हुन् भने रिजाल केन्द्रीय सदस्य हुन् ।

आइतबार रातिदेखि नै केन्द्रीय नेताहरु प्रदीप ज्ञवाली, पद्मा अर्याल, सूर्य थापाले दुवै उम्मेदवारसँग सहमतिका लागि छलफल जारी राखेका छन् । तर सहमतिको सम्भावना न्यून रहेको एमाले उपमहासचिव ज्ञवालीले बताए । ‘अध्यक्ष पदका दुई उम्मेदवारबीच सहमति गराउने प्रयास अझै जारी नै छ,’ उनले भने, ‘तर प्रतिस्पर्धाको सम्भावना बढी देखिन्छ ।’

अध्यक्ष, उपाध्यक्ष, सचिवमा २/२ जनाको उम्मेदवारी दर्ता भएको छ । उपसचिवमा १२ जना र सदस्यका लागि तीन सय जना बढीको उम्मेदवारी दर्ता भएको निर्वाचन प्रमुख हरिप्रसाद भण्डारीले बताए ।

अध्यक्षको पदसँगै उपाध्यक्षमा कँडेलका तर्फबाट रुपन्देहीका भोजप्रसाद श्रेष्ठ र सचिवमा गुल्मीका सोमनाथ सापकोटा र दाङका लक्ष्मण आचार्यले उम्मेदवारी दर्ता गराएका छन् । त्यस्तै, रिजालको तर्फबाट उपाध्यक्षमा बाँकेका पुजन विकले उम्मेदवारी दर्ता गराएका छन् । अध्यक्ष पदका उम्मेद्वार कँडेलले निर्वाचन कार्यालयमा आफैं उपस्थित भएर र रिजालले वारेसमार्फत उम्मेदवारी दर्ता गराएको निर्वाचन कार्यालयले जनाएको छ । कँडेल राजु श्रेष्ठको प्रस्ताव र भोजराज पोखरेलको समर्थनमा उम्मेदवार बनेका छन् । त्यस्तै, रिजाल विजयविराज विष्टको प्रस्ताव र बालसिंह काउछाको समर्थनमा उम्मेदवार बनेका छन् ।

एमाले अधिवेशनका लागि लुम्बिनी प्रदेशका १२ जिल्लाका १ सय ९ स्थानीय तहबाट १ हजार ४ जना प्रतिनिधि छनोट भएर आएका छन् । जिल्लागत प्रतिनिधिको रुपमा १ सय ८६ जना, खुल्लाबाट पदाधिकारीसहित १५ जना, मजदुरबाट ३ र अपांगबाट १ जना गरी अधिवेशनले २ सय ५ जनाको लुम्बिनी प्रदेश कमिटी चयन गर्ने छ ।

सोमबार ३ बजेसम्ममा निर्वाचन गराएर आजै परिणाम सार्वजनिक गर्ने गरी निर्वाचन कार्यालयले तयारी गरिरहेको छ ।