खोज

सल्यान, ८ साउन ।
सल्यान शारदा नगरपालिकाको १२ नम्बर वडामा जेष्ठ नागरिक, अशक्त तथा गर्भवती महिलाको लागि निःशुल्क यातायात सेवा सुरु भएको छ । वडाबासी नागरिकको स्वास्थ्यलाई ध्यानमा राखेर वडा कार्यालयले यस्तो व्यवस्था गरेको हो ।

गत बर्ष गर्भवती महिलाको लागि मात्रै सुत्केरी हुन अस्पतालसम्म जानका लागि निःशुल्क यातायात सेवा प्रदान गरेको वडा नम्बर १२ ले यो आर्थिक बर्षदेखि ७० बर्ष माथिका जेष्ठ नागरिक तथा अति अशक्त र अपांगता भएका व्यक्तिहरूका लागि पनि सेवा सुरु गरेको वडा अध्यक्ष सुरेन्द्र बुढाले जानकारी दिए । उनले भने, —‘आर्थिक रुपमा बिपन्न र तत्कालै स्वास्थ्य सेवा लिन नसक्नेहरूलाई सुबिधा दिनका लागि यो व्यवस्था सुरु गरेका हौं ।’

वडा कार्यालयका अनुसार गत आर्थिक बर्ष २०७९÷०८० मा ६० जना भन्दा बढि गर्भवती महिलाले सेवा लिएका थिए । यो आर्थिक बर्षदेखि गर्भवती महिलाहरूलाई सुत्केरी गराउन जिल्ला अस्पताल लैजान र ल्याउन, जेष्ठ नागरिक, अपांगता भएका र असहायहरूका लागि पनि जिल्ला भित्रका अस्पतालसम्म जान आउन निःशुल्क यातायात सेवा सुरु गरिएको वडा अध्यक्ष बुढाले जनाए । उनका अनुसार यस आर्थिक बर्षको एक हप्ताको अवधिमा मात्रै ८ जना गर्भवती महिलाहरूले सेवा लिइसकेका छन् ।

वडामा एम्बुलेन्स नभएका कारण अन्य गाडीको व्यवस्था गरेर वडा कार्यालयले भाडा बापतको रकम भुक्तानी दिने गरेको छ । वडा अध्यक्ष बुढाले भने, ‘बिरामी भएका अशक्त, अपांगता भएका, जेष्ठ नागरिक, गर्भवतीसँग साथमा पैसा नहुन सक्छ । हामिले निःशुल्क यातायात सेवाको बारे वडाभरी सूचना सम्प्रेषण गरेका छौं, त्यसै अनुसार उहाँहरूले हामिलाइ सम्पर्क गर्नुहुन्छ र वडाले तुरुन्तै गाडिको व्यवस्था गरिदिन्छ ।’

यस बर्ष स्वास्थ्य सम्बन्धी कार्यक्रम तर्फ आफ्नो वडाले २५ लाख रूपैयाँ विनियोजन गरेको भन्दै उनले यहि बजेटबाट निःशुल्क यातायात सेवा संचालन गरिने बताए । जिल्ला भित्रका सरकारी अस्पताल, स्वास्थ्य संस्था तथा प्रसूति गृहमा जान आउनका लागि वडाले यो सेवाको व्यवस्था गरेको हो ।