दाङ, ३१ वैशाख ।
खानेपानीको मुहान संरक्षण गरेमा वितरणमा सहज हुने औंल्याइएको छ । तुलसीपुर उपमहानगरपालिकाका प्रमुख टीकाराम खड्काले खानेपानी वितरणका लागि मुहान संरक्षण अनिवार्य रहेको बताए ।
हलवार खानेपानी उपभोक्ता तथा सरसफाई समितिको पन्ध्रौ साधारण सभाको उद्घाटन गर्दै नगरप्रमुख खड्काले पछिल्लो समयमा खानेपानीका मुहान सुक्दै गएकाले दीर्घकालीनरुपमा समस्या समाधानका लागि मुहानहरु थप्ने र संरक्षण गर्ने कामलाई प्राथमिकता दिनुपर्ने बताए । उनले खानेपानी जस्तो संवेदनशील र आधारभूत क्षेत्रलाई संघ र प्रदेश सरकारकै मातहतमा राख्दा स्थानीय सरकारले नियमनबाहेक अन्य भौतिक संरचना निर्माणको क्षेत्रमा काम गर्न नसकेको बताए ।
उनले मुहान संरक्षण गर्दै संस्थाको तयार भएको विस्तृत विवरण प्रतिवेदन(डिपिआर) कार्यान्वयनका लागि संघ र प्रदेश सरकारसमक्ष माग गर्ने बताए । पानी विनाको जीवन कल्पना पनि गर्न नसकिने भएका कारण सबै नागरिकले पानी संरक्षणलाई आफ्नो दायित्व सम्झनुपर्ने उनले बताए ।
वडा नम्बर –४ का वडाध्यक्ष तुलसी थापामगरले संरक्षण गर्ने र सदुपयोग गर्ने दायित्व सबैको रहेको बताए । कार्यक्रममा कार्यसमिति अध्यक्ष दोलख खत्रीले धारा विस्तार गर्दै लगेको, प्रत्येक धारामा मिटर जडान गरिएको र सहुलियत दरमा खानेपानी वितरण गरिएको बताए । समितिमार्फत पाँच सय धारा वितरण गरिएको छ ।
नयाँ कार्य समिति चयन
तुलसीपुर उपमहानगरपालिका वडा नम्बर ४ मा रहेको हलवार खानेपानी उपभोक्ता तथा सरसफाई समितिको अध्यक्ष र सचिव पद बाहेक अन्य पदाधिकारी सर्वसम्मत निर्वाचित भएका छन् । समितिको शनिबार वनहरिमा सम्पन्न भएको पन्ध्रौँ साधारणसभाले अध्यक्ष र सचिव बाहेक अन्य पदाधिकारी निर्विरोध निर्वाचित गरेको छ । निर्वाचन समितिका संयोजक फनेन्द्र भट्टराईले दिएको जानकारी अनुसार अध्यक्ष र सचिव पदमा सहमति हुन नसकेपछि अध्यक्ष पदमा ४ जना र सचिव पदमा २ जनाले उम्मेद्वारी दिएका छन् । जसमा अध्यक्षमा रगविर घर्ती, प्रभात थापा, प्रविन देवकोटा र प्रकाश आचार्यको उम्मेद्वारी परेको छ ।
अध्यक्ष पदमा उम्मेद्वारी दिएका आचार्य निवर्तमान उपाध्यक्ष हुन् भने थापा निवर्तमान सचिव हुन् । यस्तै सचिवमा चन्दबहादुर केसी र ओमकान्त रिजालको उमेदवारी परेको छ । तर उनीहरुबीच सहमतिको प्रयास भैरहेको छ । दुई पदमा सहमति हुन बाँकी भएपनि उपाध्यक्ष, कोषाध्यक्ष र सदस्यहरुमा सर्वसम्मत चयन गरिएको छ । जसमा समितिको उपाध्यक्षमा यमलाल पार्धे र कोषाध्यक्षमा शोभा खनाल निर्विरोध निर्बाचित भएको भट्टराईले जानकारी दिएका छन् ।
७ मंसिर २०८१, शुक्रबार
