खोज

कपिलवस्तु, १६ पुस

नेपाली काँग्रेस कपिलवस्तुको आयोजनामा ४७ औं मेलमिलाप दिवसको अवसर पारेर विचार गोष्ठीको आयोजना गरिएको छ । नेपाली काँग्रेसको पार्टी कार्यालय तौलिहवामा आयोजित विचार गोष्ठीमा बोल्ने अधिकांश वक्ताले बामपन्थीहरु एक भएको अवस्थामा बिपीको मेलमिलाप नीति थप सान्दर्भिक भएकाले पार्टीमा मेलमिलापको नीति अख्तियार गर्नु पर्नेमा जोड दिए ।

सो अवसरमा बोल्दै पार्टीका लुम्बिनी प्रदेश महामन्त्री तथा साँसद सुरेन्द्रराज आचार्यले काँग्रेस बीचको ईमान्दारिता नहुँदा पार्टी कमजोर बनेको बताए । नेताले आदर्शको कुरा गरे पनि व्यवहारमा लागु गर्न नसक्ने र कार्यकर्ता अनुशासनमा बस्न नसक्ने अवस्थालाई सुधारेर अगाडि बढ्नु पर्ने अवस्था आएको आचार्यले बताए । आपसी मनमुटावले केन्द्रको नीति, निर्देशन नमानेका कारण पार्टीको यो हविगत भएको उनले बताए ।

पार्टीका नेताको कार्यशैलीले वर्तमान मूल्याङ्कन गर्ने र भविष्यको निश्चितता गर्ने भएकाले काँग्रेस सुधारेर लैजाने अवस्था आएको निवर्तमान केन्द्रीय सदस्य तथा साँसद अतहर कमालले बताए । पार्टीको नीति र निर्देशन मान्ने नैतिक दायित्व र कर्मशिलता कायम गरेर पार्टीलाई सुदृढ बनाउन सकिने उनको सुझाव थियो । काँग्रेसबीचको समस्या पत्ता लगाई समाधानको उपाय खोजेर अगाडि बढ्न सकिए पार्टी सशक्त हुने नेता दिप कुमार उपाध्यायले बताए ।

देशमा अन्य दल एकजुट भएका बेला काँग्रेसका नेता कार्यकर्ताले आफु भित्रका तिता मिठा बिर्सेर मेलमिलापको नीति अख्तियार गर्नुपर्ने पुर्व जिल्ला सभापति तथा प्रदेश साँसद सुधाकर पाण्डेयको भनाई थियो । राष्ट्रिय शक्ति एक भई जनताको अधिकार पुनःस्थापित गराउने उद्देश्यले बिपी २०३३ सालमा नेपाल फर्किएको स्मरण गर्दै संकटका बेला काँग्रेसमा मेलमिलापको नीतिले थप महत्व पाउनु पर्ने पुर्व जिल्ला सभापति कमलेश कुमार शर्माको भनाई थियो । पार्टी नेतृत्वमा युवा पुस्तालाई पुर्याएर पार्टी सशक्त बनाउन तथा अन्य पार्टीतिर लागेका काँग्रेस कार्यकर्तालाई पार्टीमा फेरि जोड्न आवश्यक रहेको निवर्तमान साँसद अभिषेक प्रताप शाहको सुझाव थियो ।

बिपीको मेलमिलापको नीतिले अहिलेको अवस्थामा सान्दर्भिकता पाएको पार्टीका पुर्व जिल्ला सभापति राजेश आचार्यको भनाई थियो । पार्टीका नेता कार्यकर्ता एकजुट भएर संगठन सशक्तिकरणमा लाग्नु पर्ने पार्टीका लुम्बिनी प्रदेश सदस्य रवि ठाकुरले बताए । मेलमिलाप दिवस सबै काँग्रेसका नेता कार्यकताका लागि महत्वपूर्ण दिन भएको र पार्टी भित्र मेलमिलाप आवश्यक रहेकोमा क्षेत्र नम्बर १ को (क) का प्रदेश सभापति दुर्गा केसीले बताए ।

पार्टीका नेता कार्यकर्तामा बिचलन देखिदै जानु दुःखद भएको बताउँदै अबै सबै परिवर्तित भएर पार्टी सुदृढ बनाउन लाग्नु पर्नेमा जिल्ला सदस्य सिता न्यौपानेले जोड दिईन् । आफु भित्रको गलत भावना त्यागी मेलमिलापको नीति अख्तियार गर्नु पर्ने नेपाल शिक्षक संघका जिल्ला अध्यक्ष अफाक अहमद खाँले बताए । जिल्ला सभापति अब्दुल कलाम खाँको अध्यक्षतामा सम्पन्न विचार गोष्ठीमा जिल्ला उपसभापति हुमकान्त खनाल र जिल्ला सचिव शक्ति सिंह ठकुरीले पार्टीमा मेलमिलापको नीति अख्तियार गरेर अगाडि बढ्नु पर्ने सुझाव दिए ।