खोज

बर्दघाट, ०२ असोज ।

मंगलबारदेखिको अविरल वर्षाको कारण अवरुद्ध दाउन्ने सडक खण्ड सञ्चालनमा आएको छ । बर्दघाट क्षेत्रमा अविरल वर्षाको कारण बुधवार बिहान केही समय सडक अवरुद्ध भए पनि दिउसो देखि पूर्ण सञ्चालनमा आएको जिल्ला ट्राफिक प्रहरी कार्यालयले जानकारी दिएको छ ।

बर्दघाट नगरपालिका वडा नम्बर ४ मा पर्ने दाउन्न सडक खण्डको सुख्खा खोलामा पहाडबाट लेदो बगी आउँदा केही समय सडक सञ्चालन अवरुद्ध भएको थियो ।

एकतर्फी सञ्चालनमा रहेको सडकमा जम्मा भएको लेदो पन्छाए पछि सडक दुईतर्फी सञ्चालन भएको जिल्ला ट्राफिक प्रहरी प्रमुख ट्राफिक प्रहरी निरीक्षक अमृत भण्डारीले जानकारी दिए ।

बुधवार बेलुकीसम्म पनि मौसममा खासै सुधार नभएको र पानी पर्ने सम्भावना कायमै रहेकोले सडक विभाग र सडक निर्माण ठेकेदार कम्पनीसँग समन्वय गरी डोजर लगायतका सडक सञ्चालनका लागि आवश्यक उपकरणहरूका लागि समन्वय गरिएको प्रहरी निरीक्षक भण्डारीले जानकारी दिए ।

बुटवल नारायण घाट सडक खण्डको दाउन्न सडक खण्डको १४ किलोमिटर सडक सामान्य वर्ष हुँदा समेत अवरुद्ध हुँदा घटौँ जाम लाग्ने गरेको छ । बुटवल–नारायण घाट सडक खण्डको अधिकांश सडक कम्तीमा एकतर्फी पिच भए पनि दाउन्न सडक खण्डमा द्रुतगतिमा काम हुन सकेको छैन ।

सडक खण्डको अधिकांश बाटोमा जोखिम मोलेरै सवारी सञ्चालन गर्नुपर्ने बाध्यता रहेको छ । पुर्न ठुलो वर्षा नभको खण्डमा बाटो निरन्तर सञ्चालन हुने प्रहरीले जानकारी दिएको छ । यसै गरी बुटवल पाल्पा खड खण्डमा पनि सवारीका साधनहरू सञ्चालन भएको प्रहरीले बताएको छ ।

ठुलो पानी परेको खण्ड अथवा पहिरो गए मात्र बाटो बन्द हुने प्रहरीले बताएको छ । यसै गरी बुटवल रामनगरको बाटो पनि सवारीका साधनहरू सञ्चलन भएका छन् । पुल भासिए पछि वैकल्पिक बाटो प्रयोग गरेर सवारीका साधनहरू सञ्चालन भई रहेको छ ।