खोज

काठमाडौँ,१७ भदौ ।

सामाजिक सञ्जाल फेसबुकको कन्टेन्ट मोनेटाइजेसनका लागि नेपाल पनि योग्य देशको सूचीमा परेको छ ।

फेसबुकले एडमार्फत आम्दानी गर्न सकिने कन्टेन्ट मोनेटाइजेसन सुविधा उपलब्ध गराइएका देशहरूमा नेपाललाई पनि समावेश गरेको हो । यसको अर्थ अब फेसबुकमा पोस्ट गरिने पब्लिक भिडिओ र रिलहरू मार्फत नेपाली प्रयोगकर्ताले पनि पैसा कमाउन सक्नेछन् ।

यसअघि नेपाल यो सूचीमा परेको थिएन । फेसबुकले निश्चित देश र भाषामा प्रकाशित कन्टेन्टलाई मात्रै मोनेटाइजेसनको सुविधा दिने गर्दछ ।

 फेसबुकले धेरै भाषाका भिडिओहरू मोनेटाइजेसनका लागि योग्य नहुन सक्ने जानकारी दिएको छ ।

फेसबुकका अनुसार, भिडिओ र रिल हेर्दा देखिने विज्ञापनहरू र ‘परफमेन्स बोनस प्रोग्राम’ भने अगस्ट ३१ बाट बन्द गरिएको छ । सो प्रोग्राम बन्द गरेसँगै फेसबुकले नयाँ मोनेटाइजेसन प्रणाली ल्याएको हो, जसमा क्रिएटरहरू सहभागी हुन सक्नेछन् ।

नेपालसमेत परेका ७० देशलाई यो सुविधा दिइएको फेसबुकले जनाएको छ ।

अबदेखि फेसबुकमा पोस्ट गरिने रिल, फोटो, टेक्स्ट पोस्ट र स्टोरीहरू पनि मोनेटाइज गर्न सकिने छ । यसअघि छुट्टाछुट्टै रूपमा चलाइएका कार्यक्रमहरूलाई मर्ज गरेर नयाँ कार्यक्रम ल्याइएको हो ।

फेसबुकले हालसम्म १० लाख क्रिएटरलाई बीटा संस्करणमा सहभागी गराइसकेको र आगामी महिनाहरूमा अझ धेरैलाई निमन्त्रणा गर्ने जानकारी दिएको छ ।

यस प्रोग्राममा सहभागी हुनका लागि क्रिएटरहरूले आफ्नो प्रोफेसनल ड्यासबोर्ड मा गई मोनेटाइजेसन ट्याब खोलेर ‘कन्टेन्ट मोनेटाइजेसन’ मा क्लिक गर्नुपर्नेछ । त्यसपछि उपलब्ध भएमा यो सुविधा प्रयोग गर्न सकिनेछ ।