खोज

बुटवल, २९ असार ।

मानव सेवा आश्रममा आश्रय लिएकाहरुलाई खाना खुवाएर रोटरी क्लब अफ बुटवल चौतारीले आफ्नो २५७ औं नियमित बैठक सम्पन्न गरेको छ । रुपन्देहीको तिलोत्तमा भलवारीस्थित मोक्षधाममा सञ्चालित मानव सेवा आश्रममा आश्रय लिएकाहरुलाई शनिबार भोजनसहित रोटरी चौतारीले आफ्नो नियमित बैठक सम्पन्न गरेको हो ।

रोटेरीयनहरु बासु भुसाल, विष्णु भट्टराई र विष्णु पौडेलको जन्मदिन र वैवाहिक वर्षगाँठको अवसरमा क्लबले आश्रमका बासिन्दाहरूको लागि माया र सम्मानका साथ खाना वितरण कार्यक्रम गरेको हो ।

 कार्यक्रममा क्लवका संस्थापक अध्यक्ष डा. विष्णु घिमिरे, निवर्तमान अध्यक्ष नुमेन्द्र पौडेल, पूर्वअध्यक्ष पिदनेशमणि सुवेदीलगायत सम्पूर्ण रोटरीयनहरुको सहभागिता थियो । कार्यक्रममा क्लवका अध्यक्ष राजु अधिकारीले मानव सेवा नै सबैभन्दा ठूलो धर्म रहेको र रोटरी क्लव अफ बुटवल चौतारी र मानव सेवा आश्रमबिच धेरै वर्षदेखि निरन्तर सहकार्य रहँदै आएकोले अहिले पनि यसैलाई निरन्तरता दिइएको बताए ।

क्लवका निवर्तमान अध्यक्ष नुमेन्द्र पौडेलले आफूले जन्मदिनको अवसर पारेर आश्रममा आश्रितहरुका लागि बिगतमा भोजन गराउँदै आएको स्मरण गर्दै आगामी दिनमा पनि आश्रमसँग सहकार्य जारी राख्ने प्रतिवद्धता व्यक्त गरे ।

कार्यक्रममा रोटरीयन वासु भुसाल, विष्णु भट्टराई र विष्णु पौडेलले पनि शुभकामना मन्तव्य व्यक्त गरेका थिए ।

विभिन्न कारणले बेसहारा, अशक्त, असहाय, अनाथ, अभिभावकबिहीन बन्न पुगेका व्यक्तिहरुलाई मानवसेवा आश्रमले आश्रय दिदै आएको छ । यसरी आश्रय लिएकाहरुलाई क्लवले खाना खुवाएको अध्यक्ष अधिकारीले जानकारी दिए ।

क्लबका संस्थापक अध्यक्ष डा. विष्णु घिमिरेले मानव सेवा आश्रममा कार्यक्रम गर्न पाउँदा खुसीको अनुभूति भएको बताए । उनले क्लबले आगामी दिनमा पनि आश्रममा सहयोग गर्ने प्रतिवद्धता व्यक्त गरे ।

आश्रममा १२५ जनाले आश्रय लिएका छन् । पछिल्लो समय वैवाहिक उत्सव, जन्मदिन, पितृकार्यलगायतका अवसरमा आश्रममा आश्रितलाई खाना खुवाउने र आर्थिक सहयोग गर्ने क्रम बढ्दै गएको छ् ।