काठमाडौं ।
नेकपा एमालेका सांसद सूर्य थापाले कारागारमा रहेका एक व्यक्तिको नाममा गरिएको याचनालाई लिएर चलाइएको हस्ताक्षर अभियानलाई “नाटकीय” र “राजनीतिक प्रोपोगाण्डा” भएको टिप्पणी गरेका छन्। सोमबार प्रतिनिधिसभामा बोल्दै उनले राष्ट्रिय स्वतन्त्र पार्टी (रास्वपा) र सभापति रवि लामिछानेलाई लक्षित गर्दै उक्त टिप्पणी गरेका हुन्।
थापाले भने, “७ असार २०८२ मा नै भैरहवा कारागारमा पूर्पक्षमा रहेका एक व्यक्तिको नाममा १५ पृष्ठ लामो अपिल सार्वजनिक भएको छ। त्यसैका आधारमा अहिले हस्ताक्षर संकलन भइरहेको छ, जुन याचनापत्र हो।”
उनको भनाइमा, सो अभियानले अदालतमा चलिरहेका आधा दर्जनभन्दा बढी मुद्दामा प्रभाव पार्न सक्दैन। “यो प्रतिशोध होइन, राजनीति हो,” उनले भने, “सर्वोच्च अदालतले हस्ताक्षरको संख्या होइन, तथ्य, प्रमाण र कानुनी तर्कका आधारमा निर्णय गर्छ।”
सांसद थापाले हस्ताक्षर अभियानलाई ‘राजनीतिक प्रचार र रोटी सेक्ने उपक्रम’ भनी टिप्पणी गर्दै अदालतको आदेशविपरीत हुने गतिविधिमा सांसदको संलग्नता खेदजनक भएको धारणा राखे। उनले राजनीतिक अभियान चलाएर अदालतको निर्णयलाई प्रभाव पार्न खोज्नु लोकतान्त्रिक अभ्यासको अपमान भएको पनि बताए।
थापाले अन्त्यमा भने, “अदालतको आदेश हस्ताक्षरले बदल्न सक्दैन। अदालत तथ्यमा टिकेको हुन्छ, संख्यामा होइन। यो कुरा हेक्का राखौं।”
