काठमाडौं ।
काठमाडौं महानगरपालिकाकी उपप्रमुख सुनिता डङ्गोलले महानगरको बजेट प्रक्रिया संविधान र कानुनले तोकेको परिधिभित्र रहेर संयमता र सहकार्यको भावनाका साथ अघि बढाउन सबै जनप्रतिनिधिहरूलाई अपिल गरेकी छन्।
सामाजिक सञ्जालमार्फत सार्वजनिक सन्देश जारी गर्दै डङ्गोलले बजेटप्रति देखिएको अन्योल र ढिलाइप्रति चिन्ता व्यक्त गर्दै सबैलाई खुलेर छलफल गर्न र वातावरण सम्हालेर अघि बढ्न आग्रह गरेकी हुन्। “डुङ्गा प्वाल पारेर अरूलाई खसाल्ने र आफू मात्र बच्ने बाटो खोज्नु दुर्भाग्यपूर्ण हुन्छ,” उनले लेखेकी छन्, “हामी सबै हातेमालो गरेर अघि बढ्नुपर्छ।”
उनले कानुनी रूपमा महानगरपालिकाले असार १० गतेभित्र बजेट प्रस्तुत गर्नुपर्ने र असार मसान्तभित्र पारित गर्नुपर्ने बाध्यता भएको स्मरण गराउँदै, अझैसम्म कार्यपालिका, नगरसभा, बजेट तर्जुमा समिति, र स्रोत अनुमान तथा बजेट सीमा निर्धारण समिति जस्ता बैठकहरू समेत नबसेकोप्रति चिन्ता व्यक्त गरिन्।
उपप्रमुख डङ्गोलले आफूले ‘सहकार्य, सहमति र सहअस्तित्व’ को सिद्धान्तलाई आत्मसात् गर्दै सुरु देखिनै सकारात्मक भूमिका निर्वाह गर्दै आएको बताउँदै, महानगरवासीको बृहत्तर हितलाई प्राथमिकतामा राखेर कार्य गरिरहेको स्पष्ट पारिन्। “मैले मेरो अधिकारभित्र रहेर जनप्रतिनिधिहरूसँग अनौपचारिक छलफलमा पनि बजेट समयमा ल्याउनुपर्ने विषय बारम्बार उठाउँदै आएकी छु,” उनले भनिन्।
उनले हालसम्म भएका अनौपचारिक छलफलहरू, विशेषतः मेयर, प्रवक्ता तथा अन्य कार्यपालिका सदस्यहरूसँगको संवादमा पनि यस विषयमा सकारात्मक संकेतहरू आएको उल्लेख गरिन्।
प्रमुख प्रशासकीय अधिकृतबारे उठेका विवादका सम्बन्धमा डङ्गोलले बैठकहरूमा उनको उपस्थिति अनिवार्य रहेको धारणा राखेकी छन्। “उहाँ बैठकबाट बाहिर हुँदा जनप्रतिनिधिका प्रश्नबाट भाग्न खोजिएको हो कि भन्ने शंका जनतामा उठ्न सक्छ,” भन्दै उनले प्रमुख प्रशासकीय अधिकृतलाई बैठकमा सहभागी गराई खुला प्रश्नोत्तरको वातावरण सुनिश्चित गर्नुपर्नेमा जोड दिइन्।
डङ्गोलले निष्कर्षमा भनिन्, “जनताबाट निर्वाचित प्रतिनिधिको रूपमा हामीले आफ्नो जिम्मेवारी पूरा नगरे काठमाडौँबासीलाई धोका दिएको ठहरिनेछ। त्यसैले सहकार्य, सहमति र सहअस्तित्वको भावनाका साथ अगाडि बढ्न सबै जनप्रतिनिधिलाई आग्रह गर्दछु।”
