खोज

गुल्मी, २३ असार ।

मदाने गाउँपालिकाको आयोजनामा उत्कृष्ट विद्यालय, शिक्षक तथा विद्यार्थीहरूलाई सम्मान तथा छात्रवृत्ति वितरण गरिएको छ । जिल्ला समन्वय समिति प्रमुख द्रोण बहादुर खत्रीले उत्कृष्ट सबै जनालाई सम्मान गरेका हुन ।
कार्यक्रममा स्वैच्छिक अवकाश कोष प्रोत्साहन अनुदान अन्तर्गत सेवा निवृत्त शिक्षक चुरा बहादुर बोहोरालाई सम्मान गरिएको थियो । बोहोरालाई कर कट्टी बाहेक नगद एक लाख नगद सहित सम्मान गरिएको गाउँपालिकाका प्रमुख प्रशासकीय अधिकृत सालिकराम पन्थीले जानकारी दिएका छन् ।

त्यस्तै भर्खरै सार्वजनिक भएको एसइई परीक्षामा उत्कृष्ट नतिजा ल्याउने विद्यालयका प्रधानाध्यापक सञ्जय कुमार सेन, गाउँपालिका भित्र उत्कृष्ट नतिजा ल्याउने छात्रा अंशु पौड्याल र छात्र प्रशान्त भट्टराईलाई पनि सम्मान गरिएको गाउँपालिका उपाध्यक्ष सरिता खड्काले बताएकी छन् । उत्कृष्ट नतिजा ल्याउने दलित तर्फका छात्रा अप्सना विक र छात्र सूर्य बहादुर विक सम्मानित भएका छन् ।

जनजाति तर्फका उत्कृष्ट नतिजा प्राप्त गर्ने छात्रा मुना घर्ती र छात्र मञ्जिल श्रेष्ठ तथा प्राविधिक धारतर्फ उत्कृष्ट नतिजा ल्याउने छात्रा मुना थापालाई सम्मान गरिएको प्रमुख प्रशासकीय अधिकृत पन्थीले बताए । साथै सिकाई उपलब्धि परीक्षण अन्तरगत कक्षा ३, ५, ८ र नौ मा प्रथम, द्वितीय र तृतीय हुने विद्यालयलाई सम्मान गरिएको थियो भने सिकाइ उपलब्धी परीक्षामा कक्षा ३,५, ८ र ९ मा प्रथम, द्वितीय र तृतीय हुने विद्यार्थीहरूलाई पनि सम्मान गरिएको थियो ।

त्यसैगरी उपाध्यक्षसँग शिक्षा कार्यक्रम अन्तर्गत विद्यालयले छनौट गरेर पठाएका ४४ जना जेहेन्दार, क्षमता प्रस्फुटन अन्तरगत २१ जनालाई सम्मान गरिएको थियो । वडा शिक्षा समितिले शिक्षक दरबन्दीको अनुपातको आधारमा सिफारिस गरेका ४० जना शिक्षक तथा कर्मचारीलाई सम्मान गरिएको हो ।  कार्यक्रममा विद्यालयका विभिन्न तहका प्रधानाध्यापकसँग गरिएको करार सम्झौता अनुसार उत्कृष्ट विद्यालयलाई अनुदान वितरण गरिएको मदाने गाउँपालिकाका शिक्षा शाखाका विषय विज्ञ खिम बहादुर कुँवरले जानकारी दिए ।

मदाने गाउँपालिका अध्यक्ष महेन्द्र बहादुर कुँवरको अध्यक्षतामा सम्पन्न उक्त सम्मान तथा छात्रवृत्ति कार्यक्रममा गाउँपालिका उपाध्यक्ष सरिता खड्काले कार्यक्रमको उद्देश्य माथि प्रकाश प्रकाश पारेकी थिइन । उक्त कार्यक्रममा विभिन्न विद्यालयका शिक्षक शिक्षिकाहरू, विद्यार्थी, राजनैतिक दलका प्रतिनिधि, अभिभावक तथा विभिन्न व्यक्तिहरूको सहभागिता रहेको थियो ।