खोज

 गुल्मी, २३ असार ।

रुरु रेसुङ्गा यातायात प्रालिले गुल्मीको सदरमुकाम तम्घासदेखि काठमाडौँसम्म लामो दूरीको यात्रालाई लक्षित गरी आइतबारदेखि इस्क्वारपियो गाडी सञ्चालन गरेको छ । यस सेवा अन्तर्गत अबदेखि सदरमुकाम तम्घासबाट काठमाडौँका लागि बिहान ५ः३० बजे र काठमाडौँ नयाँ बसपार्क स्थित मित्रनगरबाट तम्घासका लागि बिहान ६ः०० बजे इस्क्वारपियो गाडी छुट्ने भएको छ ।

तम्घास–काठमाडौँ यात्राको भाडा दर एक जना यात्रुको लागि एकतर्फी २५०० रुपैयाँ निर्धारण गरिएको छ । दुवै तर्फबाट दैनिक एक–एकवटा सवारी साधन सञ्चालन हुनेछ । उक्त इस्क्वारपियो हाललाई पाल्पाको रामपुर हुँदै सञ्चालनमा ल्याइएको छ । सो गाडीमा सात जना यात्रु सिट क्षमता रहेको जानकारी दिइएको छ । टिकट प्राप्त गर्ने स्थान तम्घासको भगवती मन्दिर नजिकको काउन्टर र काठमाडौँको एक्चुअल होलिडे होटल नयाँ बसपार्क मित्रनगरमा रहेको छ ।

सेवा शुभारम्भको अवसरमा आइतबार यात्रुहरूलाई टिका र खादा लगाई बिदाइ गरिएको थियो । रुरु रेसुङ्गा यातायात प्रालिका अध्यक्ष बषन्त श्रेष्ठका अनुसार यात्रुहरूलाई छिटो, सुरक्षित र सहज सेवा दिनका लागि जिल्लाबाट पहिलो पटक लामो दूरीको इस्क्वारपियो सेवा सञ्चालन गरिएको बताइएको छ ।

संस्थाका उपाध्यक्ष सुमन कार्कीका अनुसार यातायात प्रालिले विगत आठ वर्षदेखि जिल्लाभित्र तथा पाल्पा र बुटवलसम्म यातायात सेवा दिँदै आएको छ । यात्रुहरूको चाप बढेमा आगामी दिनमा सवारी साधन थप गरिने संस्थाका सचिव उदयकुमार कार्कीले जानकारी दिएका छन् ।