खोज

बुटवल, ६ असार। भरतनाट्यम नृत्यको संरक्षण र नयाँ पुस्तामा हस्तान्तरण गर्ने उद्देश्यका साथ रुपन्देहीमा आयोजित एक हप्ते भरतनाट्यम डान्स वर्कसप सम्पन्न भएको छ । नृत्यकर्मी संघ नेपाल लुम्बिनी प्रदेशको आयोजनामा तथा साधना सांस्कृतिक कला केन्द्र बुटवलको सहकार्यमा तिलोत्तमामा वर्कसप सम्पन्न गरिएको हो ।

कार्यक्रमको समापन सत्रमा लुम्बिनी प्रदेशकी पूर्वमन्त्री भगवती घिमिरेले सहभागीलाई प्रमाणपत्र वितरण गर्दै भरतनाट्यम नृत्य अनुशासन, हावभाव, अभिव्यक्तिका माध्यमबाट संस्कृति जगेर्नाको सशक्त माध्यम भएको बताइन्। हिन्दु धर्म, संस्कृति, र पौराणिक कथाहरूसँग जोडिएको यो नृत्य विधाले नयाँ पुस्तालाई आफ्ना जरा चिन्न मद्दत गर्ने बताउँदै यसलाई संरक्षण गर्न आफू प्रतिवद्ध रहने प्रतिवद्धता व्यक्त गरिन् ।

कार्यक्रममा प्याब्सन लुम्बिनी अध्यक्ष लालहरि पाण्डेले लोपोन्मुख सांस्कृतिक सम्पदालाई जगेर्ना गर्न तीनै तहका सरकारलाई सहकार्य गर्न आग्रह गरे । उनले यस किसिमका वर्कसपले सांस्कृतिक चेतना जगाउने महत्वपूर्ण काम गरिरहेको उल्लेख गरे ।

कार्यक्रममा पेट्रोलियम डिलर्स एशोसियसनका सदस्य अभिषेक भारी, नृत्यकर्मी संघ नेपाल लुम्बिनी प्रदेशका अध्यक्ष मुकेश गुरुङ, साधना सांस्कृतिक कला केन्द्रकी अध्यक्ष प्रियंका थापाले भरतनाट्यमले शारीरिक तथा मानसिक सन्तुलन कायम राख्ने कलाको रुपमा विशेष महत्व राख्ने बताए ।

कार्यक्रममा ज्ञानगंगा पाठशालाका प्रधानाध्यापक चन्द्र अधिकारीले समेत भरतनाट्यमजस्ता शास्त्रीय नृत्यहरू विद्यालय शिक्षामा समेत समेटिनुपर्ने धारणा राखे । वर्कसपमा नृत्य प्रशिक्षक स्वोजन रघुबंसीले ४ दर्जन सहभागीहरूलाई एक हप्तासम्म भरतनाट्यम नृत्यको व्यवहारिक तथा सैद्धान्तिक प्रशिक्षण दिएका थिए ।
यसैबिच प्रशिक्षार्थीहरु बिच गरिएको नृत्य प्रतियोगितामा युवराज समूह प्रथम, पुनम थापाको समुह द्वितीय, हिमाल थापा र किशोर थापा समूह तृतीय स्थान हासिल गरेका छन ।
सांस्कृतिक आत्मपहिचान निर्माणमा यस्ता वर्कसपले युवाहरूलाई जडमा फर्काउने प्रयास गरेको आयोजकले जनाएका छन् ।