काठमाडौं, ६ असार ।
इजरायल र इरानबीच जारी तनावपूर्ण परिस्थितिका कारण त्यहाँ रहेका नेपालीहरूको सुरक्षालाई लिएर नेपाल सरकार सक्रिय भएको छ। परराष्ट्र मन्त्रालयले गृहमन्त्रालय, श्रम तथा रोजगार मन्त्रालय, संस्कृति पर्यटन तथा नागरिक उड्डयन मन्त्रालयसँग संयुक्त छलफल गर्दै स्वदेश फर्कन चाहने नेपालीहरूलाई उद्धार गर्नेबारे रणनीति बनाएको छ।
परराष्ट्रमन्त्री डा. आरजु राणा देउवाले बैठकपछि जानकारी दिँदै भनिन्, “स्वदेश फर्कन चाहने नेपालीहरूले परराष्ट्र मन्त्रालयले स्थापना गरेको पोर्टलमा नाम दर्ता गर्न अपिल गरिएको छ। युद्ध सुरु भएदेखि नै सरकारले यो अवस्थालाई गम्भीर रूपमा लिएको छ।”
उद्धार कसरी, कहिले र कुन माध्यमबाट गर्ने भन्ने विषयमा प्राविधिक तयारीबारे पनि छलफल भएको उनले बताइन्। साथै, अन्य तीन मन्त्रालयका अधिकारीहरूलाई समेटेर परराष्ट्र मन्त्रालयमै एउटा संयुक्त युनिट बनाउने निर्णय बैठकले गरेको छ, जसले २४ घन्टा निगरानी र समन्वयको काम गर्नेछ।
सरकारले इजरायल र इरानस्थित नेपाली दूतावासमार्फत पनि सक्रियता बढाएको छ। उद्धार प्रक्रिया सुचारु गर्न सम्बन्धित मुलुकहरूसँग आवश्यक संवाद भइरहेको बताइएको छ।
