काठमाडौं ।
भिजिट भिसा प्रकरणको विषयलाई लिएर राष्ट्रिय प्रजातन्त्र पार्टी (राप्रपा)ले प्रतिनिधिसभामा कडा आवाज उठाएको छ। बिहीबारको बैठकमा राप्रपाका प्रमुख सचेतक ज्ञानेन्द्र शाहीले बोल्दै, विगतदेखि हालसम्मका १४ जना गृहमन्त्रीहरूलाई छानबिनको दायरामा ल्याउनुपर्ने माग गरेका हुन्।
उनले पूर्व गृहमन्त्री कृष्णप्रसाद सिटौला देखि हालका गृहमन्त्री रमेश लेखकसम्मको जिम्मेवारी उठाउँदै, भिजिट भिसा प्रकरण कुनै एक दलको नभएर सार्वजनिक सरोकारको विषय भएकाले सबै दलहरू यो विषयमा एकजुट हुनुपर्ने बताए।
ज्ञानेन्द्र शाहीले भिजिट भिसा प्रकरणमा छानबिन समिति गठन नभएसम्म विरोध कायमै रहने स्पष्ट घोषणा गरे। साथै, राप्रपाको विरोधकै बीच संसद् अगाडि बढाउन नखोज्न सभामुखमार्फत सरकारलाई सुझाव पनि दिए।
संसद् बैठकमा कार्यसूची अघि बढेपछि रास्वपाका सांसदहरूले ‘बेल घेराउ’ गरे भने, राप्रपाका सांसदहरू भने बैठक बहिष्कार गरेर बाहिरिए। संसदमा भिजिट भिसा काण्डले पैदा गरेको असहज परिस्थिति र राजनीतिक दलहरूबीचको तनाव स्पष्ट देखाएको छ।
