खोज

 काठमाडौं ।

 प्रधानमन्त्री केपी शर्मा ओलीले प्रमुख प्रतिपक्षी दल माओवादी केन्द्रका अध्यक्ष पुष्पकमल दाहाल ‘प्रचण्ड’ र नेपाली कांग्रेस सभापति शेरबहादुर देउवासँग त्रिपक्षीय राजनीतिक छलफलको प्रयास गरेका छन्। यद्यपि प्रचण्ड काठमाडौं बाहिर रहेकाले छलफल हुन सकेको छैन।

प्रधानमन्त्रीको सचिवालयका अनुसार मंगलबार र बुधबार तीन दलका शीर्ष नेताहरूबीच बैठक राख्ने तयारी गरिएको थियो। नेपाली कांग्रेस सभापति देउवा छलफलका लागि सकारात्मक देखिए पनि प्रचण्ड चितवनमै रहेका कारण बैठक सारिँदै आएको हो।

“मंगलबार बेलुकी काठमाडौं आउने भनिएपछि छलफल बुधबार सारिएको थियो, तर उहाँ आउनुभएन,” प्रधानमन्त्रीको सचिवालयका एक अधिकारीले जानकारी दिए। “आज दिउँसो २ बजे राखिएको छलफल पनि प्रचण्डको उपस्थितिमा भर पर्छ।”

छलफलको मुख्य एजेन्डा संक्रमणकालीन न्यायसँग सम्बन्धित विषय हो। नेताहरूका अनुसार, पीडितका आवाजलाई कसरी सम्बोधन गर्ने र आयोगको काममा अनावश्यक हस्तक्षेप नगर्ने विषयमा तीन दलबीच सहमति खोजिने प्रयास हो।

यता नेपाली कांग्रेस र नेकपा एमालेबीच भने नियमित संवाद भइरहेको छ। बुधबार बेलुकी पनि दुबै दलका नेताहरूबीच यस विषयमा छलफल भएको थियो। प्रचण्ड काठमाडौं फर्किएपछि त्रिपक्षीय छलफल हुने अपेक्षा गरिएको छ।