काठमाडौँ ।
राष्ट्रिय स्वतन्त्र पार्टीका सांसद मनिष झाले भिजिट भिसा प्रकरण र मानव बेचबिखनको संगठित अपराधमा संलग्नहरूको विषयमा आफूहरू पछाडि नहट्ने स्पष्ट पारेका छन्। मंगलबार संघीय संसद भवन नयाँ बानेश्वरमा सञ्चारकर्मीसँग कुराकानी गर्दै उनले यो विषय कुनै पार्टी विशेषको मात्र नभई जनताकै गहिरो सरोकार भएको बताए।
झाले सरकारले ल्याउन लागेको विधेयकहरूको महत्त्व आफूहरूले बुझेको उल्लेख गरे। उनले विधेयकप्रति राजनीतिक समर्थन दिन तयार रहेको संकेत दिंदै, त्यसै अनुरूप सरकार पनि रास्वपाले उठाएको गम्भीर विषयप्रति संवेदनशील हुनुपर्ने धारणा राखे। उनका अनुसार, सरकार जति संवेदनशील भएर विधेयक अघि बढाउँदैछ, उति नै संवेदनशीलताका साथ भिजिट भिसा र मानव बेचबिखनको मुद्दामा पनि उच्चस्तरीय छानबिन हुन जरुरी छ।
उनले छानबिनका लागि उच्चस्तरीय छानबिन आयोग, न्यायिक समिति वा संसदीय विशेष छानबिन समिति जस्ता संयन्त्र आवश्यक रहेको औंल्याए। यो माग केवल राजनीतिक नारा नभई १८ वर्षदेखि पीडित हुँदै आएका हजारौँ नेपाली जनताको प्रतिनिधि आवाज भएको उनले बताए। उनका अनुसार अब फेरि ठगिनु नपरोस् भन्ने जनताको भावना र अपेक्षा रास्वपाले सदनमा उठाइरहेको हो।
गृहमन्त्री रमेश लेखकको नाम भिजिट भिसा प्रकरणसँग जोडिएपछि रास्वपाले उनको राजीनामा माग्दै आएको छ। यसै सन्दर्भमा रास्वपाले संसद निरन्तर अवरुद्ध गर्दै सरकारमाथि दबाब सिर्जना गरिरहेको छ।
