खोज

काठमाडौँ ।

संसद्‌मा जारी अवरोध हटाउने प्रयासस्वरूप सभामुख देवराज घिमिरेले मंगलबार प्रमुख पाँच दलका प्रतिनिधिहरूसँग छलफल गरेका छन्। संसद्को चौथो ठूलो दल राष्ट्रिय स्वतन्त्र पार्टी (रास्वपा)ले गृहमन्त्री रमेश लेखकको राजीनामाको माग गर्दै गरेको अवरोधको सन्दर्भमा सभामुखले यो पहल गरेका हुन्।

छलफलमा कानुन, न्याय तथा संसदीय मामिला मन्त्री अजयकुमार चौरसिया, उपसभामुख इन्दिरा राना, तथा प्रमुख सचेतकहरू—एमालेका महेश बर्तौला, कांग्रेसका श्याम घिमिरे, माओवादी केन्द्रका हितराज पाण्डे, रास्वपाका सन्तोष परियार र राप्रपाका ज्ञानबहादुर शाही सहभागी थिए।

यसअघि सभामुखले गृहमन्त्री लेखक, सत्तारूढ दलका मुख्य सचेतक बर्तौला र रास्वपाका प्रमुख सचेतक परियारसँग छुट्टाछुट्टै भेट गरी अवरोध अन्त्यको उपायबारे छलफल गरेका थिए।

यसैबीच, रास्वपा सांसदहरू निलो स्कार्फ बाँधेर संसद् प्रवेश गरेको विषयमा विभिन्न दलका सांसदहरूले आपत्ति जनाउँदै सभामुखको ध्यानाकर्षण गराएका छन्। उनीहरूले यो कार्य संसदीय मर्यादाविपरीत भएको भन्दै कडाइका साथ नियन्त्रण गर्न आग्रह गरेका छन्।

सभामुख घिमिरेले भने आफू स्वनियमनको पक्षमा रहेको उल्लेख गर्दै, संसदीय मर्यादाभित्र बस्नु प्रत्येक सांसद र राजनीतिक दलको कर्तव्य भएको बताएका छन्।