खोज

काठमाडौँ, ३ असार ।

राष्ट्रिय स्वतन्त्र पार्टी (रास्वपा) का सांसदहरूले निलो रिबन बाँधी प्रतिनिधिसभा बैठकमा प्रवेश गरेपछि सत्तारूढ दल नेपाली कांग्रेसले त्यसलाई संसद्को मर्यादा विपरीत पोशाक भन्दै सभामुख देवराज घिमिरेको ध्यानाकर्षण गराएको छ।

कांग्रेस प्रमुख सचेतक श्याम घिमिरेले सोमबारको संसद बैठकमा बोल्दै रास्वपाका केही सांसदले संसदको पोशाकसम्बन्धी नियम उल्लंघन गरेको आरोप लगाए। उनले नियमावलीको उल्लेख गर्दै यस्ता पोशाकमा सांसदहरू उपस्थित हुनु नियमविपरीत रहेको दाबी गरे।

उनले भने, “संसद्‌मा मर्यादित पोशाकमा आउनुपर्छ भनेर नियमावलीमा स्पष्ट व्यवस्था गरिएको छ। स्कार्फ, रिबन जस्ता वस्तुहरू मर्यादित पोशाकमा पर्छन् कि पर्दैनन् भन्ने प्रश्न उठ्छ। यदि यस्तो व्यवहारलाई स्वीकृति दिइयो भने भोलि कोही हाफ पाइन्ट लगाएर पनि संसद्मा आउने अवस्था आउन सक्छ।”

घिमिरेले नियमावलीको दफा ३० र ३१ उल्लेख गर्दै सभामुखले चेतावनी दिन सक्ने र अवज्ञा गरेमा सांसदलाई निष्कासनसम्म गर्न सकिने प्रावधान रहेको स्मरण गराए।

रास्वपा र राप्रपा सांसदहरूले भिजिट भिसा प्रकरणमा गृहमन्त्री रमेश लेखकको राजीनामा माग्दै निरन्तर संसदमा विरोध जनाइरहेका छन्। यो विरोधको प्रतीकस्वरूप सांसदहरूले निलो रिबन बाँधेर संसद् प्रवेश गरेका थिए, जसप्रति कांग्रेसले औपचारिक रूपमा आपत्ति जनाएको हो। अब सभामुखले यसबारे के निर्णय लिन्छन् भन्ने कुराले आगामी संसद् बैठकको कार्यवाही र वातावरणमा असर पार्न सक्नेछ।