खोज

काठमाडौँ ।

नेकपा (माओवादी केन्द्र)का अध्यक्ष तथा पूर्वप्रधानमन्त्री पुष्पकमल दाहाल ‘प्रचण्ड’ ले सत्तारूढ दलहरू नेपाली कांग्रेस र नेकपा (एमाले) संसद्को अवरोध खुलोस् भन्नेमा इच्छुक नभएको टिप्पणी गरेका छन्।

मंगलबार चितवनमा आयोजित पत्रकार सम्मेलनमा बोल्दै प्रचण्डले हाल संसद्मा विचाराधीन कानुन निर्माण प्रक्रियालाई रोक्ने मनसाय सत्ताको नेतृत्वमा रहेको पक्षबाट देखिएको आरोप लगाए।

उनले भने, “कांग्रेस र एमाले अहिले सरकारमा छन्, तर उनीहरू कानुन निर्माणमा अघि बढ्न चाहँदैनन्। यस्तो देखिन्छ कि संसद् अवरोध रहिरहोस् भन्ने चाहना सत्तापक्षमै छ।”

प्रचण्डका अनुसार संसद्मा संघीय निजामती ऐन, विद्यालय शिक्षा ऐन, नागरिकता ऐन, तथा सत्यनिरूपण तथा मेलमिलाप आयोग (टीआरसी) सम्बन्धी कानुनहरू विचाराधीन अवस्थामा छन् र ती टुंगोमा पुर्‍याउनुपर्ने जिम्मेवारी सरकारको हो।

उनले आफूहरूको पार्टीले जिम्मेवार भएर छानबिन समिति गठन गरी ३० दिनभित्र निष्कर्षमा पुग्ने प्रतिबद्धता जनाएकाले ऐन निर्माण प्रक्रियालाई प्राथमिकता दिएको बताए।

प्रचण्डले चेतावनी दिँदै भने, “असार १५ गतेसम्म विद्यालय शिक्षा ऐन पास गर्न नसके शिक्षा क्षेत्र झन् अराजकतातिर धकेलिन सक्छ।”

उनको भनाइ अनुसार, अवरोधको स्थिति जस्ताको तस्तै राख्ने प्रवृत्तिले संविधानसमेत संकटमा पार्ने सम्भावना देखिएको छ। यसैले सहमतिका आधारमा अघि बढ्न र बाँकी कानुनी कार्य टुंग्याउन माओवादी केन्द्र प्रतिबद्ध रहेको उनले दोहोर्‍याए।