खोज

बुटवल, ३ असार । प्रकृतिमैत्री संस्कृति र सहअस्तित्वको प्रतीकका रूपमा रहेको साइकल संस्कृतिको प्रवद्र्धन गर्न जरुरी रहेको एक कार्यक्रममा बोल्ने बक्ताहरुले जोड दिएका छन । साइकल संस्कृतिको विषयमा लेखिएको ‘साइकल सौन्दर्य’ पुस्तकका लेखक तथा अभियन्ता प्रा.डा. तारालाल श्रेष्ठसंग बुटवलमा गरिएको अन्तरक्रिया कार्यक्रममा पर्यावरण संरक्षण, वैकल्पिक यातायातको प्रवद्र्धन र पर्यटन विकासमा साइकलको भूमिका महत्वपूर्ण रहेको धारणा व्यक्त गरे ।

कार्यक्रममा प्रा.डा. तारालाल श्रेष्ठले आफनो पाचौ पुस्तक तयार गर्दाको स्मरण गर्दै साइकलको विश्व इतिहास, नेपालमा साईकलको विगत र वर्तमान अवस्था, साईकल कानुनका लागि हस्ताक्षर संकलन अभियान लगायत विविध पाटाहरु समेटेको बताए । साइकलको पुस्तकबाट आफु सन्तुष्टी मिलेको भन्दै उनले पुस्तकमा छुटेका धेरै विषयबस्तुहरुलाई आगामी पुस्तकमा प्रकाशन गर्ने समेत बताए ।

बुद्धजन्मस्थल लुम्बिनीलाई केन्द्रित गरी साइकल पर्यटनलाई प्रवद्र्धन गर्न सकिने ठूलो सम्भावना रहेको कार्यक्रमका वक्ताहरूले औंल्याए । उनीहरूले निजी क्षेत्रको पर्यटन व्यवसायसँग मिलेर साइकल संस्कृति जगेर्ना गर्ने उपायहरू अघि सार्नुपर्ने आवश्यकता पनि जोड दिए । बुटवलमा निर्माण भइरहेको नेपालकै सबैभन्दा ठूलो साइकल लेनलाई उदाहरण दिँदै वक्ताहरूले पूर्वाधार विकासमा ढिलाइ भए पनि यो सम्भावना र अवसरहरूको संकेत भएको जनाए ।

कार्यक्रममा बुटवल युनाईटेड साईक्लिङ क्लबका सचिव राजु तिवारीले बुटवललगायत पाँच वटा पालिकामा साइकलमैत्री पूर्वाधारको माग गर्दै ज्ञापनपत्र बुझाइसकेको जानकारी दिएका थिए ।

कार्यक्रममा मनोरोग विशेषज्ञ डा.मनोज ढुगानाले साइकल पर्यावरण, आम नागरिकको शारीरिक र मानसिक स्वास्थ्य, पर्यटन लगायत विविध पाटोमा जोडिएको बताए । पार्किङको अभाव, ट्राफिक व्यवस्थापन, साइकल ट्याकको आवश्यकताजस्ता विषयहरू सम्बोधन हुन नसक्दा साईकल संस्कृति अवरोध सृजना भएको उनले दुखेसो गरे । हिमालय बुक्स हाउसका सञ्चालक तथा पाठक मंच बुटवलले पठन संस्कृतिको विकास, पुस्तक अभियान चलाउदै आएको छ ।