खोज

बुटवल, २ असार । रोटरी क्लब अफ बुटवल र रोटरी क्लब अफ गोरखपुर मिडटाउनबीच दुईदिने सिस्टर क्लबको संयुक्त बैठक तथा शुभकामना आदान–प्रदान कार्यक्रम सम्पन्न भएको छ । ‘भातृत्व विकास र पर्यटन प्रवद्र्धन’ भन्ने उद्देश्यसहित गोरखपुरमा सम्पन्न बैठकले दुवै क्लबबीचको सम्बन्धलाई थप प्रगाढ बनाएको आयोजक गोरखपुर मिडटाउनका अध्यक्ष डा. सुधिर अग्रवालले बताए । सिस्टर क्लबबीचको सम्बन्ध पारिवारिक जस्तो भएको उल्लेख गर्दै यस सम्बन्धलाई अझ सशक्त बनाउने उनले प्रतिबद्धता व्यक्त गरे । दुई क्लबबीचको पारिवारिकसंगै थप संस्थागत गर्दै अगाडि बढ्न मद्यत मिल्ने उनले बताए ।

कार्यक्रममा रोटरी क्लब अफ बुटवलका अध्यक्ष प्रज्वल थान्जुले रोटरीमार्फत अन्तराष्ट्रिय सम्बन्ध र भाईचारा विकास भएको भन्दै सिस्टर क्लबबीच आगामी वर्षदेखि स्वास्थ्य, शिक्षा र पर्यटन प्रवद्र्धनका परियोजना संयुक्त रुपमा अघि बढाउने तयारी भएको जानकारी दिए । दुई देशमा रहेका पर्यटकिय क्षेत्रको पर्वद्धनमा समेत योगदान मिल्ने उनले दाबी गरे ।

कार्यक्रममा क्लबका पूर्वअध्यक्षहरू डा. मनोहर जोशी, पुरन प्रसाद श्रेष्ठ र राजेन्द्र लम्साललाई सम्मान गरिएको थियो ।
कार्यक्रममा रोटरी क्लब अफ बुटवलबाट २१ जना सहभागी रहेका थिए भने दुबै क्लबहरु बिच मायाको चिनोको आदान प्रदान समेत गरिएको थियो । सहभागी टोलीले भारतका सबैभन्दा प्रसिद्ध धार्मिक पर्यटकीय गन्तव्यहरूमध्ये एक गोरखपुरस्थित गोरखनाथ मन्दिर भ्रमण गरेका थिए । यो मन्दिर दुई देशबीचको धार्मिक आस्था र सांस्कृतिक सम्बन्ध रहेको मानिन्छ ।