खोज

 काठमाडौँ ।

एघारौँ विश्व योग दिवसलाई भव्य र प्रभावकारी ढंगले मनाउने तयारीका सन्दर्भमा आज प्रधानमन्त्री केपी शर्मा ओलीसँग योग क्षेत्रका प्रतिनिधि तथा सम्बन्धित मन्त्रालयका अधिकारीहरूको छलफल भएको छ। बालुवाटारस्थित प्रधानमन्त्री निवासमा सम्पन्न छलफलमा तीन तहका सरकारहरूबाट योग दिवस मनाउन गठित मूल समारोह समितिले गरिरहेको तयारीबारे प्रधानमन्त्रीलाई जानकारी गराइएको हो।

छलफलका क्रममा प्रधानमन्त्री ओलीले नेपाललाई योग र ज्ञानको तपोभूमि भन्दै, योगलाई स्वास्थ्य र जीवनशैलीसँग जोडेर निरोगी नेपाल अभियान अन्तर्गत कार्यक्रमहरू सञ्चालन गर्न सुझाव दिए। उनले योग अभ्यासलाई राष्ट्रिय अभियानका रूपमा अघि बढाउनुपर्नेमा जोड दिए।

बैठकमा शिक्षा, विज्ञान तथा प्रविधिमन्त्री रघुजी पन्त, जीवन विज्ञान संस्थाका संस्थापक एलपी भानु शर्मा, योगगुरु रमेश नेपाल, मूल समारोह समितिका सदस्यसचिव शिवकुमार सापकोटालगायतको सहभागिता थियो।

यो वर्षको योग दिवस ‘योगा फर वान अर्थ, वान हेल्थ’ भन्ने आदर्श वाक्यसहित असार ७ गते (जुन २१) मनाइने भएको छ। यस अभियानलाई विद्यालय तहदेखि युवापुस्तामा विस्तार गर्ने विषयमा पनि छलफल भएको थियो। शिक्षामन्त्री पन्तले योग अभ्यासलाई विद्यालय पाठ्यक्रम र गतिविधिमा समावेश गर्दै नयाँ पुस्तामा योगप्रति रुचि र नियमितता बढाउनु आवश्यक रहेको धारणा राखे।

गत जेठ २९ गते शिक्षा मन्त्रालयमा भएको बैठकबाट मूल समारोह समिति गठन गरिएको हो, जसले देशव्यापी रूपमा दिवसको आयोजना र समन्वयको कार्य सम्हालिरहेको छ।