खोज

बुटवल, ०१ असार ।

विश्व रक्तदाता दिवसको अवसरमा रुपन्देहीमा ६४ जना नियमित रक्तदातालाई सम्मान गरिएको छ । रक्तदान गरौँ आशा जगाऔँ सँगै मिली जीवन बचाऔँ भन्ने नाराका साथ नेपाल रेडक्रस सोसाइटी रुपन्देही शाखाको आयोजनामा विश्व रक्तदाता दिवस २०८२को अवसरमा आयोजित रक्तदाता सम्मान कार्यक्रममा नियमित रक्तदान गर्नेलाई सम्मान गरिएको हो।बुटवल उपमहानगरपालिका प्रमुख खेलराज पाण्डेय, जिल्ला सभापति रामचन्द्र उपाध्याय, उपसभापति एवं रक्तसञ्चार केन्द्र समिति संयोजक सुशील गुरुङ लगायतले सम्मान गरेका थिए ।

अग्रज सम्मानित अन्तरगत यस क्षेत्रको पहिलो रक्तदाता मृगेन्द्र शेरचन, चित्रमान गौचन लगायत ५ जनालाई सम्मान गरिएको थियो भने स्वर्ण पदकमार्फत ७ जना, रजत पदक मार्फत २७ जना र प्रशम्सापत्रबाट २५ जना गरि ५९ जनालाई सम्मान गरिएको थियो ।कार्यक्रममा बुटवल उपमहानगरपालिका प्रमुख खेलराज पाण्डेयले रक्तदान मानव जीवन बचाउने महत्त्वपूर्ण भएकोले बुटवलका स्थानीयलाई रगत किन्दा लाग्ने रकम तिर्नु नपर्नेगरि रेडक्रससँग सम्झौता भएको बताउँदै सबै पालिकाले यसो गरेमा जनताले निःशुल्क गरेको रगत बिरामीले निःशुल्क प्राप्त गर्न सक्ने बताए ।

उपसभापति एवं रक्तसञ्चार सेवा समिति रुपन्देहीका संयोजक सुशील गुरुङले निरन्तर रक्तदान गर्नको लागि प्रोत्साहन गर्न सम्मान कार्यक्रम गरिएको बताउँदै यस्ता सम्मानले रक्तदाताको मनोबल बढ्नुका साथै नियमित गर्ने वातावरण बन्नेमा विश्वास व्यक्त गरे ।कार्यक्रममा रेडक्रस रुपन्देही सभापति रामचन्द्र उपाध्यायले रेडक्रसले चाहेर मात्रै रगत निःशुल्क हुने अवस्था नरहेको बताए । नेपाल स्वयंसेवी रक्तदाता समाजका महासचिव कृष्ण चौहान क्षेत्रीले निःशुल्क रगतका लागि पालिका पालिकासँग सम्झौता गर्नुभन्दा प्रदेश सरकारसमक्ष गएमा निःशुल्क रगत प्रदानमा सहजता हुने उल्लेख गरे ।
नियमित रक्तदाता समाजका अध्यक्ष दया शिलवालले रगतको आवश्यकता अनुसार रक्तदान नभएको अवस्थामा यस्ता सम्माने रक्तदाताको नियमिततामा राम्रो प्रभाव पार्ने उल्लेख गरे ।

रक्त सञ्चार सेवा केन्द्र बुटवल इन्चार्ज राधा शर्मा ज्ञवालीले प्रशंसा पत्र, रजत पदक र कास्यपदक पाउनेको लागि विभिन्न मापदण्ड रहेको बताउँदै महिला पुरुष तथा दुर्लभ रक्तदाताको लागि पनि छुट्टै व्यवस्था रहेको जानकारी गराइन् । ३३ पटक रक्तदान गरेकी गोमा ज्ञवालीले महिलाले रक्तदान गर्न सक्छन् भन्ने उदाहरण बन्न पाउँदा खुसिलागेको बत्ताइन । सम्मानित रक्तदाता अशेष सीलवालले सम्मानले नियमित रक्तदान गर्ने मनोबल बढेको बताउँदै रगतको सम्मानको रूपमा लिएको बताए । मन्त्री टेकराज थापाको सञ्चालन तथा कोषाध्यक्ष अर्जुन राज उपाध्यायको सिद्धान्त वाचनमा कार्यक्रम सम्पन्न भएको थियो ।