खोज

काठमाडौँ ।

पछिल्लो एक सातामा टेकु अस्पतालमा पाँच जनामा कोरोना संक्रमण पुष्टि भएको छ। अस्पतालका निर्देशक डा. युवानिधि बसौलाका अनुसार, ज्वरो लगायतका लक्षणसहित आएका बिरामीहरूको परीक्षण गर्दा पाँच जनामा संक्रमण देखिएको हो। तीमध्ये एक जनालाई क्याबिनमा भर्ना गरिएको छ भने बाँकीलाई घरमै आइसोलेसनमा बस्न सुझाव दिइएको छ।

क्याबिनमा भर्ना गरिएको बिरामी चार दिनअघि काठमाडौंको एक निजी अस्पतालबाट रेफर भएर आएको थियो र उनको स्वास्थ्य अवस्था सुधारोन्मुख छ।

इपिडिमियोलोजी तथा रोग नियन्त्रण महाशाखाका निर्देशक डा. चन्द्रभाल झाले भारतमा कोरोना संक्रमितको संख्या बढेसँगै नेपालमा पनि केही प्रभाव परेको बताए। केही दिनअघि भारतबाट आउने मानिसहरूको सीमा क्षेत्रमा परीक्षण गर्दा संक्रमण पुष्टि भएको तर हाल संक्रमणको नयाँ केस रिपोर्ट नभएको उनले जानकारी दिए।

टेकु अस्पतालले आकस्मिक कक्षबाट खोप लगाउने कार्य निरन्तर चलाइरहेको छ। जनस्वास्थ्य विज्ञहरूले भने कोरोना महामारीकै रूपमा नभए पनि सामान्य रूपमा समाजमा फैलिरहेको उल्लेख गरेका छन्। विगत पाँच वर्षमा नेपालमा कोरोना संक्रमणका कारण १२ हजारभन्दा बढीको मृत्यु भइसकेको छ।

धुलिखेल अस्पतालका डा. राजीव श्रेष्ठले कोरोना भाइरस रुघाखोकी वा हैजाजस्ता रोग जस्तै नै बस्ने भएकाले सतर्क रहन आवश्यक भएको बताए। नयाँ भेरियन्ट आउँदा संक्रमण र गम्भीर असरबाट बच्न खोप लगाउनुपर्ने उनको सुझाव छ।