खोज

 काठमाडौं ।
सत्तारुढ नेकपा एमालेनिकट विद्यार्थी संगठन अनेरास्ववियुको २४औं राष्ट्रिय महाधिवेशन सहमतिमा निष्कर्षमा पुग्न नसकेपछि अब निर्वाचन प्रक्रियाबाट नेतृत्व चयन हुने भएको छ। अध्यक्ष पदका आकांक्षीहरूबीच सहमति जुट्न नसकेपछि निर्वाचन समितिले औपचारिक कार्यतालिका सार्वजनिक गरेको हो।

कीर्तिपुरमा जारी महाधिवेशनको बन्दसत्रमा अध्यक्ष मण्डलले सुजन कडरियाको नाम प्रस्ताव गरेपछि हलमै असन्तुष्ट प्रतिनिधिहरूले नाराबाजी गरेका थिए। प्रधानमन्त्री तथा एमाले अध्यक्ष केपी शर्मा ओलीको समर्थन कडरियालाई रहँदै आएको बताइए पनि अन्य प्रतिस्पर्धीहरू भने निर्वाचनको पक्षमा उभिएका थिए। नाराबाजी चुलिएपछि सहमतिको प्रयास विफल भएको संकेतसहित निर्वाचनको बाटो रोजिएको हो।

निर्वाचन समितिले सार्वजनिक गरेको कार्यतालिकाअनुसार आजै दिउँसो ३ देखि ५ बजेसम्म उम्मेदवारी दर्ता फारम वितरण हुनेछ भने ४ देखि ६ बजेसम्म फारम दर्ता प्रक्रिया चल्नेछ। आजै राति ८ बजेसम्म उम्मेदवारहरूको प्रारम्भिक नामावली प्रकाशित गरिने बताइएको छ। मतदान भने भोलि बिहान १० बजेदेखि साँझ ५ बजेसम्म हुनेछ।

अध्यक्ष पदका लागि पाँच जनाले दाबी प्रस्तुत गरिसकेका छन् — दीपक धामी, प्रकाश पौडेल, आरती भट्टराई, अञ्जना सिवाकोटी र सुजन कडरिया। तीमध्ये कडरियालाई संस्थापन पक्षको समर्थन रहेको बताइए पनि बाँकी प्रतिस्पर्धीहरूले निर्वाचनबाट नेतृत्व चयन हुनुपर्ने अडान राखेका छन्।

महाधिवेशनको मत परिणामले अनेरास्ववियुमा नेतृत्व परिवर्तनसँगै आन्तरिक सन्तुलन कसरी कायम हुन्छ भन्ने प्रश्नको जवाफ पनि दिनेछ।