काठमाडौँ ।
काठमाडौँ महानगरपालिका अन्तर्गत महानगर प्रहरी बलका प्रमुख राजु पाण्डे ६ महिनाका लागि निलम्बनमा परेका छन्। महानगरका प्रमुख प्रशासकीय अधिकृत सरोज गुरुगाईंको निर्णयअनुसार पाण्डेलाई मङ्गलबार निलम्बन गरिएको हो।
पाण्डेले निलम्बनको पत्र प्राप्त गरेको पुष्टि गर्दै आफूले महानगरमा इमानदारपूर्वक काम गर्दा पनि यस्तो कारवाही भएको गुनासो गरेका छन्। उनलाई गत जेठ ६ गते सात बुँदे स्पष्टीकरण सोधिएको थियो, जसमा उनले प्रशासकीय प्रमुखको कार्यसम्पादनमा अवरोध सिर्जना गरेको आरोप प्रमुख रुपमा उठाइएको छ।
प्रशासकीय अधिकृत गुरुगाईंले स्पष्टीकरणमा पाण्डेमाथि कर्मचारी आचरण विपरीत कार्य, सञ्चारमाध्यममा अनधिकृत रूपमा बयान दिनु, जनप्रतिनिधिसँग अमर्यादित व्यवहार, आदेश अवज्ञा गर्दै द्वन्द्व निम्त्याउने गतिविधि र कार्यालय प्रवेशमा अवरोध गरेको आरोप लगाएका थिए।
पाण्डेमाथि लागेको आरोप र निलम्बनको प्रक्रिया प्रशासनिक अनुशासन तथा आचरणको दृष्टिले गम्भीर मानिएको छ। अब छानबिनपछि मात्र पाण्डेको भविष्यबारे थप निर्णय गरिनेछ।
