खोज

काठमाडौं ।

प्रधानमन्त्री एवं नेकपा (एमाले) का अध्यक्ष केपी शर्मा ओलीले गृहमन्त्री रमेश लेखकको राजीनामालाई अनावश्यक विषय बनाएर प्रतिपक्षले संसद् अवरोध गर्नु लोकतन्त्र विपरीत भएको बताएका छन्। सोमबार नेकपा (एमाले) संसदीय दलको बैठकमा प्रधानमन्त्री ओलीले मङ्गलबारदेखि संसद्का नियमित गतिविधि सञ्चालन हुने बताए। उनले प्रमुख प्रतिपक्षी नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ सँग संसद् चलाउने विषयमा कुरा गर्न खोजे पनि प्रचण्ड जानीजानी सम्पर्कमा आउनुभएन भन्दै, वार्ता र संवाद नगरी सदन बन्द गर्ने मनस्थितिमा प्रतिपक्षीहरु रहेको आरोप लगाए। ओलीले विपक्षीले केही विषय नपाएर गृहमन्त्रीको राजीनामा माग गरेको तर गृहमन्त्रीमाथि कुनै उजुरी वा छानबिन नभएको उल्लेख गर्दै यसकारण संसद् अवरुद्ध हुनु नचाहिने बताए।

प्रधानमन्त्री ओलीले सडकमा कुनै समूहले माग लिएर बसे पनि त्यसलाई समर्थन गर्ने र सदन अवरुद्ध गर्ने कार्यले लोकतन्त्रलाई असहयोग पुग्ने र प्रतिगमनलाई सहयोग गर्ने बताए। देश अहिले गम्भीर परिस्थिति र चुनौतीको सामना गरिरहेको बेला सरकारले बजेट प्रस्तुत गरेको हुँदा सांसदहरूलाई तर्कसहित आफ्ना कुरा राख्न आग्रह गर्दै उनले मन्त्रीहरूलाई संसदीय गतिविधिमा ध्यान दिन निर्देशन दिए। उनले अर्थतन्त्र ओरालो लागेको र असन्तुष्ट जनताको विरोध भइरहेकाले यस अवस्थालाई बेग्लै चुनौती भने र राजतन्त्र आजको बहसको विषय नभएको पनि स्पष्ट पारे।

प्रधानमन्त्री ओलीले नेपालको समाजमा जन्मिदै राजा हुने वंशपरम्परा र दास मानसिकताको वकालत गर्नु मूर्खता भएको टिप्पणी गर्दै, अन्य मुलुकहरुमा निर्वाचित जनप्रतिनिधिमै शासन चल्ने प्रचलन रहेको र केही देशमा मात्र सिमित रुपमा राजतन्त्र रहेको बताए। उनले संविधान र कानुनको शासन हुनुपर्ने, दलभन्दा माथि जनता रहेको र सम्पूर्ण शक्ति जनतामा रहेको बताए। उनले अराजकता र असन्तुष्टवादीहरुले श्रीलंका वा बंगलादेश जस्तो अवस्था सिर्जना गर्न खोजे पनि अन्ततः ति देशहरु लोकतन्त्रमा फर्केर निकास पाएका बताएका छन्। केहीले सत्ता गुमाएको कारण वैचैनी देखिएको र सरकारको काम नदेख्ने तथा असफलता देखाउन खोज्ने प्रवृत्ति (‘घण्टाकर्ण प्रवृत्ति’) बढेको ओलीले जनाए।