खोज

काठमाडौँ, १८ जेठ ।

राप्रपा अध्यक्ष राजेन्द्र लिङ्देनले राप्रपा नेपालका अध्यक्ष कमल थापाको तत्काल र ससम्मान रिहाइको माग गरेका छन्। शनिबार काठमाडौंमा भएको प्रदर्शनका क्रममा प्रहरीले थापालाई नियन्त्रणमा लिएपछि लिङ्देनले तीव्र प्रतिक्रिया दिँदै भोलिबाट काठमाडौं उपत्यका बन्द गराउने चेतावनी दिएका हुन्।

प्रदर्शनपश्चात उपस्थित कार्यकर्तालाई सम्बोधन गर्दै लिङ्देनले आन्दोलन अब निर्णायक चरणमा प्रवेश गर्ने दाबी गरे। “अब हामी देशभरिबाट साथीभाइहरूलाई बोलाउँछौं,” उनले भने, “एकै ठाउँमा भेला होइन, ५० ठाउँबाट निस्किन्छौं। कहाँ रोक्नुहुन्छ तपाईं?”

कमल थापालाई तुरुन्तै रिहा नगरे गम्भीर परिणाम हुने चेतावनी दिँदै लिङ्देनले भने, “थापालाई यहीँ ल्याएर ससम्मान फिर्ता नगर्ने हो भने भोलिबाट काठमाडौं बन्द सुरु हुन्छ। हाम्रो बाध्यता र आक्रोशलाई कमजोरी नठान्नुस्।”

राजसंस्था र हिन्दु राष्ट्र पुनःस्थापनाको माग गर्दै राप्रपा, राप्रपा नेपाललगायत राजावादी दलहरू जेठ १५ देखि काठमाडौंमा निरन्तर प्रदर्शनमा छन्। आज नक्शाल र बालुवाटार क्षेत्रमा प्रदर्शन गरिएको थियो। निषेधित क्षेत्र अतिक्रमण गर्ने प्रयास गरेको भन्दै प्रहरीले हस्तक्षेप गर्दा स्थिति तनावपूर्ण बनेको थियो।

प्रहरीका अनुसार कमल थापासहित चार जनालाई नियन्त्रणमा लिइएको छ। थापा बालुवाटारतर्फ जुलुसको नेतृत्व गर्दै अघि बढ्न खोजेका थिए। घटनापछि आन्दोलनकारीहरू थप आक्रोशित बनेका छन् र आन्दोलनलाई अझ व्यापक बनाउने संकेत दिएका छन्।