खोज

काठमाडौं  ।

राजसंस्थाको पुनःस्थापनाको माग गर्दै राजावादीहरूले थालेको आन्दोलन आज पनि निरन्तर जारी छ। विभिन्न राजावादी दल र समूहहरूको संयुक्त पहलमा भइरहेको यो आन्दोलनको आजको कार्यक्रम नारायणचौरबाट सुरू हुने जनाइएको छ।

आन्दोलनको सुरुवात दिउँसो २ बजे नारायणचौरमा भेला भई त्यहाँबाट जुलुस निकाल्ने तयारी गरिएको छ। राप्रपा नेपालका एक पदाधिकारीले बताएअनुसार, नारायणचौर “वार्म अप” मात्र हो, मुख्य प्रदर्शन बालुवाटारमा हुनेछ।

बालुवाटार क्षेत्र सरकारद्वारा निषेधित क्षेत्र घोषणा गरिएको भए पनि, हिजोको जस्तै आज पनि प्रदर्शनकारीहरू त्यहीँ पुग्ने योजना बनाउँदै छन्। प्रदर्शनकारीहरूले हिजो सो क्षेत्रभित्र नपसी बाहिरी भागमै प्रदर्शन गरेका थिए। तर, आज स्थिति केही तनावग्रस्त हुन सक्ने संकेत देखिएको छ।

राजावादी नेताहरूले सरकार अनावश्यक कठोर भयो भने अवस्था जटिल हुन सक्ने चेतावनी दिएका छन्।

काठमाडौंका प्रमुख जिल्ला अधिकारी ऋषिराम तिवारीले बालुवाटारमा प्रदर्शन गर्न नपाइने स्पष्ट पारेका छन्। “हामीलाई आधिकारिक रूपमा जानकारी आएको छैन, तर त्यहाँ जाने योजना रहेको सुनेका छौँ,” उनले भने।

सुरक्षा निकायहरूले आजको प्रदर्शनलाई लिएर विशेष सतर्कता अपनाएका छन्। राष्ट्रपतिको सवारी पनि आज परेकाले सडक अवरोध हुन नदिने तयारीमा सुरक्षा निकायहरू छन्। प्रदर्शनकारीलाई नारायणचौरमै रोक्ने कि बालुवाटारको निषेधित क्षेत्रको सिमानासम्म आउन दिने भन्नेबारे अन्तिम निर्णय भने लिइसकेको छैन।