खोज

काठमाडौँ।

आफूलाई देशभक्त नागरिकका रूपमा चिनाउँदै आएका युवराज सफलले नेपाली कांग्रेसका नेता तथा पूर्वमन्त्री अफताब आलमलाई कर्तव्य ज्यान मुद्दामा सफाइ दिने उच्च अदालत जनकपुरका न्यायाधीशहरू विरुद्ध न्याय परिषद्‍मा उजुरी दिएका छन्।

उक्त मुद्दामा केही दिनअघि वीरगन्ज इजलासले आलमलाई सफाइ दिने फैसला सुनाएको थियो। न्यायाधीश डा. खुसीप्रसाद थारु र अर्जुन महर्जनले उक्त फैसला गरेका थिए। तर, सफलले यो फैसलाले पीडितलाई न्याय दिनुको सट्टा अन्याय र असुरक्षामा धकेलेको आरोप लगाएका छन्।

उनले न्याय परिषद्‍मा दिएको उजुरीमा जिल्ला अदालतको पूर्व आदेश उल्टाएर साक्षी र पीडितको सुरक्षामै खतरा उत्पन्न भएको उल्लेख गरेका छन्। साथै, न्यायिक प्रक्रियामा हस्तक्षेप भएको भन्दै उनले सो फैसलामाथि पुनः परीक्षण गर्न माग गरेका छन्।

सफलको माग अनुसार, जिल्ला अदालतले दिएको जन्मकैदको सजाय र उच्च अदालतले दिएको सफाइको निर्णय दुवैको विस्तृत अध्ययन गरी न्याय परिषद्ले आवश्यक कदम चाल्नुपर्नेछ। उनले संलग्न न्यायाधीशद्वयलाई निलम्बन गरी विभागीय छानबिन सुरु गर्नुपर्ने समेत उल्लेख गरेका छन्।

यस विषयमा न्याय परिषद्‌को तर्फबाट हालसम्म कुनै आधिकारिक प्रतिक्रिया आएको छैन। तर, सफलले भने आफूले उजुरी दिएको र छानबिन हुने विश्वास व्यक्त गरेका छन्।