खोज

गुल्मी, १५ जेठ ।

गुल्मीको मुसिकोट नगरपालिका र जापानको आईता प्रान्त स्थित बुङ्गो ओनो नगरपालिका बिच मैत्रीपूर्ण सहयोग आदान–प्रदान गर्ने सम्झौता गरिएको छ । मुसिकोट नगरपालिकाका मेयर जिवलाल खरेल ‘जीवन’ र जापानको बुङ्गोओना नगरका मेयर कावानो फुमितोसी बिच संयुक्त रूपमा सम्झौता पत्रमा हस्ताक्षर गरेका हुन् ।

मुसिकोट र जापानको बुङ्गो ओनो नगरपालिका बीच गत वर्ष मुसिकोट नगरपालिकामा आयोजित एक कार्यक्रममा भगिनी सम्बन्ध बिस्तार भइसकेको थियो । दुई नगरपालिका बिच कृषि, पर्यटन, शिक्षा, संस्कृति लगायतका क्षेत्रमा सहयोग पुग्ने गरी समझदारी पत्रमा हस्ताक्षर भएको मुसिकोट नगरपालिकाका प्रमुख जिवलाल खरेल ‘जीवन’ ले जानकारी गराएका छन् । नगर प्रमुख खरेलले मुसिकोट नगरपालिकाले यो महत्त्वपूर्ण अवसरलाई आगामी दिनमा थप उपलब्धि मूलक बनाउँदै अघि बढ्ने बताए ।

जापानमा आयोजित एक कार्यक्रममा बुङ्गो ओनो नगरका प्रमुख कावानो फुमितोसीले दुई नगरको नयाँ सम्बन्ध र सहकार्यले दुवै देशको अर्थतन्त्र र पर्यटन विकासमा महत्त्वपूर्ण सहयोग पुग्ने बताए । मुसिकोट जन्मिएर जापानमा व्यवसाय गर्दै कर्मथलो बनाउँदै आउनु भएका युवा व्यवसायी एवं समाजसेवी रोशन केसीले दुई देश बिचमा भगिनी सम्बन्ध बिस्तारका लागि ठुलो भूमिका निर्वाह गरेका थिए । उनले जापानको बुङ्गो ओनो नगरले पाँचौँ स्थानीय तहको रूपमा मुसिकोट नगरपालिकासँग भगिनी सम्बन्ध स्थापित गरेको बताए ।

गतबर्ष मुसिकोट नगर र आईता प्रान्त बुङ्गो ओनो नगरपालिकाका जनप्रतिनिधि बिच सद्भावनापूर्ण भेटघाट र समझदारी पत्रमा हस्ताक्षर भएको थियो । भगिनी सम्बन्ध बिस्तारको लागि जापानको बुङ्गोओनो नगरका प्रमुख फुमितोसी काबानोको नेतृत्वमा पाँच सदस्यीय टोली मुसिकोट आएको थियो । अहिले नेपालको तर्फबाट मुसिकोट नगरपालिकाका प्रमुख खरेललाई बुङ्गो ओनो नगरले जापानमा उक्त कार्यक्रमका लागि निमन्त्रणा गरेको थियो । गत वर्ष नेपाल आएको बेला मुसिकोट र बुङ्गो ओनो नगरबिचको सहमति पत्रमा हस्ताक्षर गर्दै बुङ्गो ओनो नगरका प्रमुख फुमितोसी खबानोले मुसिकोटमा कृषि क्षेत्रको विकास आवश्यक रहेको भन्दै आफूहरू त्यस क्षेत्रमा लगानी गर्नको लागि इच्छुक रहेको बताएका थिए ।