काठमाडौँ ।
सरकारले सोमबार साँझ प्रधानमन्त्रीको सरकारी निवास बालुवाटारमा बसेको मन्त्रिपरिषद् बैठकमार्फत निजामती सेवाको विशिष्ट श्रेणीअन्तर्गतका ८ जना सचिवहरूको सरुवा गरेको छ। साथै, दुई जनालाई सचिवमा बढुवा गर्दै नयाँ जिम्मेवारी दिएको छ। प्रधानमन्त्री तथा मन्त्रिपरिषद्को कार्यालय स्रोतका अनुसार स्वास्थ्य तथा जनसङ्ख्या मन्त्रालयमा प्रशासनतर्फ रहेका सचिव हरिप्रसाद मैनालीलाई संस्कृति, पर्यटन तथा नागरिक उड्डयन मन्त्रालयमा सरुवा गरिएको छ भने लोक सेवा आयोगका सचिव डिल्लीराम शर्मालाई स्वास्थ्य मन्त्रालयमा ल्याइएको छ।
संस्कृति मन्त्रालयका सचिव विनोद प्रकाश सिंह अनिवार्य अवकाशमा गइसकेपछि सो मन्त्रालयमा सचिवको पद रिक्त थियो। राष्ट्रपति कार्यालयका सचिव डा. रामप्रसाद घिमिरेलाई उद्योग, वाणिज्य तथा आपूर्ति मन्त्रालयको वाणिज्य सचिवमा पठाइएको छ भने त्यहाँ रहेका सचिव गोविन्दबहादुर कार्कीलाई प्रधानमन्त्री तथा मन्त्रिपरिषद् कार्यालयमा तानिएको छ।
शिक्षा, विज्ञान तथा प्रविधि मन्त्रालयका सचिव डा. दीपक काफ्लेलाई राष्ट्रपति कार्यालयमा सरुवा गरिएको छ भने प्रधानमन्त्री तथा मन्त्रिपरिषद् कार्यालयका सचिव चूडामणि पौडेल अब शिक्षा मन्त्रालयमा जाने भएका छन्। राष्ट्रिय प्राकृतिक स्रोत तथा वित्त आयोगका सचिव किरणराज शर्माको सरुवा लोक सेवा आयोगमा गरिएको छ।
त्यस्तै, गण्डकी प्रदेशका प्रमुख सचिव रघुराम विष्टलाई महालेखा नियन्त्रक कार्यालयमा सरुवा गरिएको छ, जहाँ सचिव पद रिक्त थियो। यसै बैठकले प्रशासनतर्फको रिक्त सचिव पदमा भूपाल बराल र प्राविधिकतर्फको रिक्त सचिव पदमा दीनानाथ शर्मालाई बढुवा गरेको छ। बढुवा भएका शर्मालाई जल तथा ऊर्जा आयोगमा र बराललाई बागमती प्रदेशको मुख्य सचिवमा पदस्थापन गरिएको हो।
यसअघि सचिवमा बढुवा गरिएका शोभाकान्त पौडेल गण्डकी प्रदेशका प्रमुख सचिवमा पुगिसकेका छन्। बराललाई बागमती प्रदेशमा पठाइएपछि त्यहाँका प्रमुख सचिव महादेव पन्थलाई प्रधानमन्त्री तथा मन्त्रिपरिषद्को कार्यालयमा ल्याइएको छ र उनलाई केही दिनमा अर्को जिम्मेवारी दिइने स्रोतले जनाएको छ।
