काठमाडौं, ९ जेठ।
गृह मन्त्रालयले भिजिट भिसाको दुरुपयोगसँग सम्बन्धित उजुरीका आधारमा सहसचिव तीर्थराज भट्टराईसहित ९ जना कर्मचारीको सरुवा गरेको छ। बुधबार अख्तियार दुरुपयोग अनुसन्धान आयोगले अध्यागमन अधिकृत भट्टराईलाई नियन्त्रणमा लिएको थियो। उनलाई नियन्त्रणमा लिनुअघि नै गृहमन्त्री रमेश लेखकले मन्त्रालयमै तानेर सरुवा गरेका थिए।
शंकास्पद गतिवधिमा संलग्न देखिएका अन्य आठ कर्मचारी पनि सरुवा भएका छन्। प्रेमप्रसाद पौडेल, वीरभद्र जोशी र नरबहादुर थापा क्रमशः काठमाडौं र बाँकेका जिल्ला प्रशासन कार्यालयमा सरुवा भएका छन्। ती तीनै जना नायब सुब्बा पदमा कार्यरत थिए।
यस्तै, सहायक कम्प्युटर अपरेटर कमला श्रेष्ठ, उदेन सुवेदी, प्रदीपकुमार यादव, पवन गुरुङ र धनराज उपाध्यायलाई कारागार व्यवस्थापन विभाग वा अन्तर्गतका निकायमा सरुवा गरिएको छ। सरुवा कार्य गृह मन्त्रालयका कर्मचारी प्रशासन महाशाखा प्रमुख सहसचिव छवि रिजालले गरेका हुन्।
