खोज

काठमाडौं ।

सिंहदरबारमा बिहीबार बसेको सार्वजनिक लेखा समितिको बैठक तनावपूर्ण वातावरणमा सम्पन्न भयो। बैठकको सुरुवातमै सभापति ऋषिकेश पोखरेल र सदस्य अमनलाल मोदीबीच तीव्र भनाभन भएको छ। मोदीले बैठकमा बोल्ने प्रयास गर्दा सभापति पोखरेलले उनलाई रोक्न खोजे, जसले विवादको रूप लिएको हो। पोखरेलले मोदीमाथि युट्युबर ल्याएर बैठकलाई ‘स्टन्ट’ बनाउने प्रयास गरेको आरोप लगाउँदै, “तपाईं सुटिङ गर्न आउनुभएको हो कि बैठकमा सहभागी हुन?” भन्दै आक्रोश व्यक्त गरे। बैठकमा सभापति पोखरेलले संसदीय समिति ‘स्टन्ट’ गर्ने थलो नभएको स्पष्ट पार्दै यस्ता क्रियाकलाप दोहोरिए सञ्चारमाध्यममाथि कडाइ गरिने चेतावनी पनि दिए। यसअघि पनि यिनीद्वयबीच यदाकदा विवाद हुँदै आएको थियो।

यही बैठकमा समितिले विभिन्न विषयमा छानबिन गर्न गठन गरिएका सात उपसमितिहरूको कार्यकाल एक महिनाका लागि थप गर्ने निर्णय पनि गरेको छ। यसअघि चैत ७ गते गठन गरिएका ती कार्यदलहरूले हालसम्म कुनै पनि प्रतिवेदन बुझाएका छैनन्, यद्यपि सुरुमा तिनलाई १५ दिनको समय दिइएको थियो। सुप्रिम सहकारीदेखि मोबाइल बैंकिङ, एमसीसी, टेलिकम, बीमा, संस्कृति, पर्यटन, ऊर्जा, सहकारी, वैदेशिक रोजगार, खेलकुद, सरकारी जग्गा लगायतका विषयमा उजुरी परेका थिए, जसको छानबिनका लागि सम्बन्धित संयोजकहरूको नेतृत्वमा कार्यदल गठन गरिएको थियो। तर, दुई महिना बितिसक्दा पनि काम नसकिएको भन्दै सभापति पोखरेलले कार्यदल विघटन गरी पूर्ण समितिबाट नै छलफल गरेर निष्कर्ष निकाल्नुपर्ने प्रस्ताव गरे। तर अधिकांश संयोजकहरूले समय अपुग भएको भन्दै म्याद थप गर्नुपर्ने तर्क गरेपछि अन्ततः बैठकले एक महिनाको म्याद थप्ने निर्णय लिएको हो।