खोज

सियान, चीन ।

राष्ट्रिय सभाका पूर्व अध्यक्ष गणेशप्रसाद तिमिल्सिनाले चीनको सियान शहरमा जारी छैटौं सिल्क रोड फोरमलाई नेपालका लागि आर्थिक सशक्तिकरणको महत्वपूर्ण अवसरको रूपमा चित्रण गरेका छन्। बिहीबार फोरमको अधिवेशनलाई सम्बोधन गर्दै तिमिल्सिनाले नेपालले भौतिक पूर्वाधार र प्रविधिको विकासमार्फत आर्थिक सुदृढीकरण गर्न फोरमले उल्लेखनीय भूमिका खेल्न सक्ने विश्वास व्यक्त गरे।

उनले फोरमले आधारभूत संरचना, व्यापार, लगानी, संस्कृति र डिजिटल कनेक्टिभिटी जस्ता क्षेत्रमा सहकार्यलाई प्रवर्द्धन गर्ने भएकाले नेपाल जस्तो विकासोन्मुख मुलुकले यसबाट विशेष लाभ लिन सक्ने उल्लेख गरे।

“बीआरआईको सहयोगमा नेपालले आफ्नो भौगोलिक अवस्थालाई अवसरमा रूपान्तरण गर्न सक्छ,” उनले भने, “यसका लागि सरकारसँग दृढ इच्छाशक्ति, पारदर्शिता र दीर्घकालीन योजना हुनु आवश्यक छ।”

तिमिल्सिनाले चीनसँगको बढ्दो सम्पर्कले नेपाली उत्पादनको अन्तर्राष्ट्रिय बजार पहुँच विस्तार गर्नसक्ने तथा पर्यटन प्रवर्द्धनमा पनि मद्दत गर्ने बताए। सिल्क रोडले अन्तर्राष्ट्रिय पर्यटक प्रवाहमा जोड दिनसक्ने भन्दै उनले यसलाई नेपालको पर्यटन विकासका लागि अवसरको रूपमा हेर्न आह्वान गरे।

त्यस्तै, उनले सिल्क रोड फोरमलाई बेल्ट एन्ड रोड पहलअन्तर्गत नीति, पूर्वाधार, व्यापार, वित्तीय सहकार्य र जनस्तरको सम्पर्क विस्तारका लागि एक प्रभावकारी प्लेटफर्मको रूपमा व्याख्या गरे।

“फोरमले आपूर्ति र औद्योगिक शृङ्खलाको एकीकरण, सांस्कृतिक आदानप्रदान, वैज्ञानिक अनुसन्धान, प्रविधि र शिक्षा जस्ता क्षेत्रहरूमा सहयोग विस्तार गर्दै नयाँ अवसर सिर्जना गर्नेछ,” उनले विश्वास व्यक्त गरे।

तिमिल्सिनाले दक्षिण एसिया र मध्य एसियासँगको सहकार्य गुणात्मक रूपमा बलियो बनाउने दिशामा पनि सिल्क रोड फोरमले सहयोग गर्ने विश्वास व्यक्त गरे।