काठमाडौँ ।
प्रतिपक्षी दलहरूको बैठकले गृहमन्त्री रमेश लेखकसम्बन्धी भिजिट भिसा प्रकरणमा उच्चस्तरीय छानबिन समिति गठन नभएसम्म प्रतिनिधिसभा अवरुद्ध राख्ने निर्णय गरेको छ। शुक्रबार बानेश्वरस्थित संसद् भवनमा बसेको बैठकमा प्रमुख प्रतिपक्षी दल नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’को अध्यक्षतामा छलफल भएको थियो। बैठकमा सहभागी रहेका राष्ट्रिय स्वतन्त्र पार्टीका सांसद शिशिर खनालले नेपालखबरसँग कुरा गर्दै गृहमन्त्रीमाथि छानबिन हुनु अत्यावश्यक रहेको भन्दै संसद् सञ्चालनमा अवरोध यथावत् राख्ने निर्णय भएको जानकारी दिए।
खनालका अनुसार बैठकमा नेपाली कांग्रेससहित अन्य दलहरूसँग पनि यसबारे थप छलफल गर्ने सहमति भएको छ। भिजिट भिसाको दुरुपयोग र त्यसमा देखिएको सम्भावित सत्ता संलग्नतालाई लिएर प्रतिपक्षले सरकारमाथि प्रश्न उठाउँदै आएको छ। यसै सन्दर्भमा उनीहरूले जिम्मेवार तहबाट छानबिनको माग गर्दै संसदीय प्रक्रियामा दबाब सिर्जना गर्ने रणनीति अघि सारेका हुन्।
