खोज

काठमाडौँ ।

चैत १५ गते काठमाडौँमा गणतन्त्रको पक्ष र विपक्षमा प्रदर्शन हुने कार्यक्रम तय भएको छ। समाजवादी मोर्चामा आबद्ध नेकपा (माओवादी केन्द्र), नेकपा (एकीकृत समाजवादी), नेपाल समाजवादी पार्टी र विप्लव नेतृत्वको नेकपाले भृकुटीमण्डपमा प्रदर्शन गर्नेछन्।

त्यसैगरी, मेडिकल व्यवसायी दुर्गा प्रसाईँको नेतृत्वमा ‘राष्ट्र, राष्ट्रियता, धर्म, संस्कृति र नागरिक बचाउ महाअभियान’ का समर्थकहरूले तीनकुनेमा प्रदर्शन गर्ने कार्यक्रम तय भएको छ।

आइतबार गृह मन्त्रालयमा बसेको सुरक्षा समितिको बैठकमा चैत १५ मा हुने यी दुई प्रदर्शनबारे छलफल गरिएको थियो। बैठकमा सहभागी एकजना उच्च अधिकृतका अनुसार, समाजवादी मोर्चा र पूर्वराजाका समर्थकहरूको प्रदर्शनमा सुरक्षा चुनौतीको जोखिम रहेको कुरा उठाइएको छ।

गृह मन्त्रालयका सचिव गोकर्णमणि दवाडी, आईजीपी दीपक थापा, सशस्त्र प्रहरीका आईजी राजु अर्याल, राष्ट्रिय अनुसन्धान विभागका प्रमुख हुतराज थापा र नेपाली सेनाका प्रतिनिधिहरू बैठकमा सहभागी थिए।

बैठकमा पूर्वराजा समर्थकहरूको गतिविधि, स्वर्गद्वारी पीडितहरूको प्रदर्शन र अस्थायी शिक्षकहरूको प्रदर्शनबारे पनि छलफल भएको छ। ‘स्वर्गद्वारी गुठी पीडित मोही किशान संघर्ष समिति’को प्रदर्शनलाई पनि सुरक्षा चुनौतीको रूपमा विश्लेषण गरिएको थियो।

फागुन १८ मा बानेश्वरको बेकरी क्याफे अगाडि भएको झडपमा ‘स्वर्गद्वारी गुठी पीडित मोही किशान संघर्ष समिति’ का प्रदर्शनकारीहरूले डीएसपी गंगा पौडेललाई आक्रमण गरेका थिए, जसको परिणामस्वरूप डीएसपी पौडेल घाइते भएका थिए।

पक्राउ परेका ५ महिला र ७ पुरुष माफी मागेर छुटेका थिए। स्वर्गद्वारी गुठीको नाममा दाङमा रहेको जग्गामा आफूहरूले खेतीपाती गरिरहेको भन्दै उनीहरूले मोहियानी हकको माग राखेका छन्। उनीहरूले केही समयदेखि काठमाडौँमा प्रदर्शन गर्दै आएका छन्।