खोज

नवलपरासी, १४ बैशाख

जिल्लाको रामग्राम नगरपालिका ७ स्थित उत्तम बालहित माविको अध्यक्षमा छनौट भएपछि अध्यक्ष डाक्टर यादवले आफ्ना बालबालिकालाई निजी विद्यालयबाट झिकेर सामुदायिक बिद्यालयमा भर्ना गराएका छन् । स्थानीय निजी विद्यालयमा अध्ययन गर्दै आएका यादवका एक छोरा र छोरी आफु अध्यक्ष भएको विद्यालयमा भर्ना गराएका हुन् ।

आफ्नो सन्तानका लागि लगानी गरी निजी विद्यालयमा पढाउने तर गाउँकै सामुदायिक विद्यालयमा सुधार आउन नसकेको हँुदा विद्यालय ब्यवस्थापन समितिको अध्यक्षको जिम्मेवारी नगरपालिकाले लगायो । आफ्नो सन्तानका लागि मात्रै नभई समुदायकै हितका लागि विद्यालयमा शैक्षिक सुधारका लागि विद्यालय ब्यवस्थापनमा आएको उनले बताए । त्यसका लागि आफ्ना छोराछोरीको समेत यसै विद्यालयमा भर्ना गराएको उनले जनाए । “विभिन्न पद र ओहदामा बस्ने ब्यक्तिले सामुदायिक विद्यालयमा आफ्ना छोरा छोरीको भर्ना नगराउने, नपढाउने आरोप पनि लाग्ने गरेको छ । तर सामुदायिक विद्यालयको शैक्षिक गुणस्तर ठिक छैन भन्ने गलत प्रचार पनि हुने गरेको छ”,उनले भने, “ती आरोप चिर्न र विद्यालयको शैक्षिक गुणस्तर वृद्धिका लागि कसरी काम गराउने ?” दिन रात खटेर सामुदायिक विद्यालयको शैक्षिक गुणस्तर सुधारका लागि काम गर्ने आफुले संकल्प लिएको उनले बताए ।

“विद्यालय ब्यवस्थापन समितिको अध्यक्ष हुने तर आफ्नो छोराछोरी निजीमा पढाउने गरेर अभिभावकको विश्वास जित्न सकिदैन”,उनले भने, “त्यो भएर अध्यक्ष हुन वा प्रधानाध्यापक, अध्यापकहरुको पनि छोराछोरी सामुदायिक विद्यालयमै पढाउनु पर्छ । आफ्ना छोराछोरी समेत तिनै विद्यालयमा पठन पाठन गरेपछि मात्रै विद्यालयको शैक्षिक गुणस्तरको सुधारका लागि पुरै ध्यान दिएर काम गर्न सक्छन् ।” विगत बर्षमा धेरै सामुदायिक विद्यालयको अध्यक्ष हुने तर आफ्नो छोराछोरीको पठन पाठन निजी स्कुलमा गर्ने गरेका थिए ।

“त्यसले अध्यक्षमाथि प्रश्न उठ्नु स्वभाविक पनि हो”,उनले भने, “आफै विद्यालय ब्यवस्थापन समितिको अध्यक्ष हुने विद्यालयप्रति अध्यक्षकै शैक्षिक गुणस्तर प्रति विश्वास नभएर निजी विद्यालयमा आफ्ना छोराछोरी पढाउने गरेका छन् ।” ती सबै प्रश्नलाई चिर्नका लागि पनि आफुले निजी विद्यालयबाट आफ्नो छोराछोरीलाई सामुदायिक विद्यालयमा भर्ना गराएको उनको भनाई थियो । विद्यालय ब्यवस्थापन समितिका अध्यक्षको यो साहसी कदम भएको सो वडाका वडाअध्यक्ष रविन्द्र यादवले जनाए । “अध्यक्षको विद्यालयप्रतिको इमानदारिता पनि हो”,उनले भने, “यस्तो सोच सबै विद्यालयका अध्यक्ष, समितिका सदस्य, प्रधानाध्यापक तथा शिक्षक कर्मचारीका छोरीछोरीलाई पहिला आफैले आफुले पढाउने शिक्षा पद्धती प्रति विश्वास गरेर भर्ना गर्नु पर्छ ।”

“सामुदायिक विद्यालयप्रति अन्य जनसमुदायको भरोसा दिलाउनु पर्छ । बोर्डिङको र निजी विद्यालयको बिरोध गरेर हुँदैन”–उनले थपे, “निजी स्कुल जतिकै अंग्रेजी माध्यम, शिक्षाको गुणस्तर विकास गरी सामुदायिक विद्यालयमा सबैका छोराछोरी पढ्न योग्य विद्यालयको रुपमा विकास गर्नु पर्छ । यसले सबैको भरोसाको विद्यालय सामुदायिक विद्यालय बन्छ ।” नगरपालिकाले पनि आवश्यकता अनुसार लगानी गर्दै आएको उनले बताए । “वडास्तरबाट पनि आवश्यकता अनुसार लगानी गर्छौ । सबै मिलेर काम गरे मात्र सामुदायिक विद्यालयको शैक्षिक गुणस्तर वृद्धि हुन्छ,आम जनसमुदायको विश्वास जाग्छ”–उनले भने ।