खोज

लमही,१७ माघ ।

लुम्बिनी प्रदेशका मुख्यमन्त्री चेतनारायण आचार्यले एक घर, एक धारा अभियानले आधारभूत तहका उपभोक्ताको खानेपानी पहुँच सुनिश्चित गरेको बताएका छन्।

भालुबाङमा बिहीबार आयोजित खानेपानी तथा सरसफाइ उपभोक्ता संस्थामा निर्णायक तहमा महिलाको भूमिका विषयक प्रदेशस्तरीय अन्तरक्रिया कार्यक्रम उद्घाटन गर्दै मुख्यमन्त्री आचार्यले प्रदेश सरकारले अघि बढाएको अभियानले ९२ प्रतिशत जनतालाई खानेपानीको पहुँचमा ल्याएको जानकारी दिए। अब सुरक्षित पानीको सुनिश्चिततामा सरकार प्रतिबद्ध रहेको उनले बताए।

“प्रदेश सरकार स्थापनाअघि र अहिलेको खानेपानी अवस्थाको तुलना गरौँ। जनतामा खानेपानी पुर्‍याउन सरकार सघन रूपमा योजना अघि बढाइरहेको छ,” उनले भने, “अब आधारभूत मात्र होइन, स्वच्छ पानी पुर्‍याउने संकल्प गरेका छौँ।”

३,१७० खानेपानी आयोजना सञ्चालनमा

लुम्बिनी प्रदेशमा हाल साना-ठूला गरी ३,१७० खानेपानी आयोजना सञ्चालनमा छन्। जसअनुसार १५ लाख ७ हजार ६६३ नागरिक शुद्ध खानेपानीको पहुँचमा पुगेका छन्, भने २ लाख ३७ हजार ३४८ धारा वितरण भइसकेका छन्।

चालु आर्थिक वर्ष २०८१/८२ मा १,३९० आयोजना सञ्चालनका लागि १ अर्ब ५६ करोड ३३ लाख रुपैयाँ बजेट विनियोजन गरिएको छ। यसै सन्दर्भमा, अघिल्ला सरकारले सुरु गरेका तर ८० प्रतिशत मात्र सम्पन्न भएका १५६ आयोजनाहरू यस वर्ष पूरा गरी पानी वितरण गरिनेछ। यी योजनाहरू पूरा भएपछि ७ लाख ७ हजार उपभोक्ता थप रूपमा लाभान्वित हुने अनुमान गरिएको छ।

अधुरा आयोजना सम्पन्न गर्ने रणनीति

“जहाँ हात हाल्छौँ, त्यहाँ सफलता प्राप्त हुन जरुरी छ,” मुख्यमन्त्री आचार्यले भने, “अधुरा आयोजना पूरा गर्न सरकार प्रतिबद्ध छ। आगामी वर्ष ६०-८० प्रतिशत सम्पन्न भएका आयोजनाहरूलाई बजेट थप गरेर पूरा गरिनेछ।”

संविधानले प्रदत्त खानेपानीको अधिकार कार्यान्वयन गर्ने प्रतिबद्धता पुनः दोहोर्‍याउँदै मुख्यमन्त्री आचार्यले खानेपानी तथा सरसफाइ उपभोक्ता संस्थामा महिलाको सहभागिता सुनिश्चित भए पनि अर्थपूर्ण भूमिका आवश्यक रहेको बताए।

“शहरी क्षेत्रमा महिलाको भूमिका अर्थपूर्ण देखिए पनि ग्रामीण क्षेत्रमा सहभागितामा मात्र सीमित छ। त्यसैले ग्रामीण संस्थाहरूमा महिला सशक्तिकरणका कार्यक्रमलाई प्राथमिकता दिनुपर्छ,” उनले जोड दिए।