खोज

नेपाल सरकारका शहरी विकास मन्त्री मेटमणी चौधरी नेकपा एकीकृत समाजवादीका केन्द्रीय सदस्य हुन् । दाङ क्षेत्र नम्वर १ गढवा गाँउपालिका ३ मानुरमा जन्मेका चौधरीले राजनीतिशास्त्रमा स्नातकोत्तर गरेका छन । नेकपा एमालेको विद्यार्थी संगठनदेखि केन्द्रीय सदस्य समेत रहिसकेका चौधरी हाल चुनावी अभियानमा व्यस्त छन् । उनी २०७४ सालमा नेपाली काँग्रेसकी सुशीला चौधरीलाई पराजित गरी प्रतिनिधि सभा सदस्यमा निर्वाचित भएका थिए । अहिले दोस्रो पटक दाङ क्षेत्र नम्वर १ बाट प्रतिनिधि सभा सदस्यमा उम्मेदवारी दिएका छन् । प्रस्तुत छ–निर्वाचनकै सन्दर्भमा केन्द्रित रहेर चौधरीसँग गरिएको कुराकानी ।

तपाइले सांसद भएर पहिलो पाँच वर्ष के गर्नुभयो, जसका कारण दोहोरिन चाहानुहुन्छ ?

–संसद भनेको विकास भन्दा पनि कानुन बनाउने थलो हो । मैले यसभन्दा अगाडि मुक्त कमैया, सुकुम्वासीहरु, मुक्त कम्लरीका लागि कानुन बनाउन सफल भएको छु । त्यसका साथै खरको छाना विस्थापित, राप्ती नदीको दुवै तर्फ पूर्णरुपमा तटवन्ध गर्नका लागि केही काम भएका छन् । गर्न बाँकी रहेका काम पुरा गर्न र हामीले बनाएका कानुनलाई कार्यान्वयनका लागि मेरो उम्मेदवारी हो ।

के एजेण्डा लिएर मतदाताकहा पुग्दै हुनुहुन्छ ?

–मेरो पहिलो एजेण्डा भनेको राप्ती करिडोर निर्माण हो । ६६ किलोमिटर करिडोर निर्माण गरी राप्ती नदीको वारी पारि शहर निर्माण गर्ने र राप्ती नदी नियन्त्रणका लागि तटवन्ध गर्ने दोस्रो योजना हो । त्यसका साथसाथै नेपालमै नभएको विकास पोडवेय आधुनिक केवलकार सन्चालन, नाकामा पुग्ने ४ वटै सडकको स्तरेन्नती र भूमिहीन सुकुम्वासी समस्या समाधानदेखि, पूर्णरुपमा खरका छाना विस्थापित रहेका छन् । दाङ भूमिहीन सुकुम्वासीहरुको क्षेत्र पनि हो । त्यसकारण उनीहरुको सम्पूर्ण अधिकार राज्यले ग्यारेन्टी गर्नुपर्छ । म निर्वाचनमा विजयी भएँ भने पहिलो कार्य उनीहरुका लागि कानुन बनाउने र बनाएको कानुन कार्यान्वयनमा जोड दिन्छु ।

त्यसका साथसाथै जनताले प्रदेश राजधानीको अनुभूति गर्ने गरी राजधानी व्यवस्थापन गर्ने, शिक्षा, स्वास्थ्य, खानेपानी, सडक लगायतका एजेण्डा छन् । मेरो प्राथमिकतामा राप्ती तथा अन्य नदीमा तटवन्ध, युवालाई रोजगारी, महिलाहरुलाई आत्मनिर्भर वनाउने रहेका छन् ।

निर्वाचनमा तपाइलाइ विश्वास गर्नु पर्ने कारण के ?

म पटक पटक सांसदमा गएको छु । तपाइ देख्न सक्नु हुन्छ शिक्षाका लागि सवै जसो विद्यालय, क्याम्पसमा बजेट विनियोजन गरेको छु । स्वास्थ्यमा वजेट छुट्टयाएको छु । मैले सामाजिक आन्दोलन र संसदमा खेलेको भूमिका मेरो निर्वाचन क्षेत्रका वासिन्दाले राम्रोगरी थाहा पाउनु भएको छ । मलाई विश्वास छ फेरि पनि मलाइ विश्वास गरेर विजयी बनाउनु हुनेछ ।