खोज

बुटवल, २५ साउन ।

संविधानको मर्म र भावना विपरित महिलाका मुद्दाहरुलाई कुल्चिने काम अहिलेको सरकारले गरेको भन्दै बाँकेकी निर्मल कुर्मीको न्यायको लागि आजदेखि माइतीघर मण्डलामा शान्तिपूर्ण आन्दोलन सुरु भएको छ । अहिलेको सरकारले पीडितलाई अझै पिडा दिएर अपराधीको संरक्षण गर्दै राज्य सञ्चालनको जिम्मा दिएर संविधानको धज्जी उठाएको अधिकर्मी रुवि खान बताउँछिन् ।

लोकतन्त्रको भावना र संविधानको मर्म विपरित सरकारको असंवेदनशील कदम विरुद्ध नेपालको संविधान हातमा बोकी पाँचौ चरणको शान्तिपूर्ण अन्दोलन सुरु गरेको उनले बताईन् ।

निर्मला कुर्मीको मुद्दा अदालत पठाउन पटक पटक सरकारले सहमति गरेपनि आफूहरुलाई कमजोर बनाउन खोज्दै मुख्य अभियुक्तलाई नै प्रदेश मन्त्री बनाई सत्ताधारी पार्टीले संरक्षण गरेको भन्दै महिला अधिकारकर्मी र पीडित परिवारले पुनः आन्दोलन सुरु गरेका हुन् ।

तीन बुँदे माग राख्दै उनीहरुले शुक्रबारदेखि पाँचौ चरणको आन्दोलन सुरु गरेका हुन् । निर्मला कुर्मी हत्याका मुख्य अभियुक्त बादशाह कुर्मीलाई मन्त्री पदबाट तत्काल हटाईयोस्, कुर्मी हत्या मुद्दा तत्काल अदालत पु¥याइयोस् आन्दोलनकारीहरुको सुरक्षाको ग्यारेन्टी गरियोस् भन्दै उनीहरूले आन्दोलन पुनः सुरु गरेका हुन् ।

बाँकेकी निर्मला कुर्मीको अपहरण तथा शरिर बन्धक, कर्तव्य ज्यान मुद्धा र सम्पत्ति हिनामिनामा संलग्न रहेको भनिएका बादशाह कुर्मीले साउन ९ गते लुम्बिनी प्रदेशको मन्त्रीको रुपमा सपथ लिएका हुन् । अहिले उनले वन मन्त्रीको जिम्मा पनि पाइसकेका छन् ।