खोज

तिलोत्तमा ।

रुपन्देहीको तिलोत्तमा–३ शंकरनगरमा महिला सशक्तिकरणको लागि उदघोषण तालिम सुरु भएको छ ।

अखिल नेपाल महिला संघ तिलोत्तमा–३ को आयोजनामा बुधबारदेखि उदघोषण तालिम सुरु भएको हो । अनेमसंघमा आवद्ध महिलाहरु सहभागी उदघोषण तालिमको उदघाटन एमाले रुपन्देहीका सचिवालय सदस्य दिनेश फुल्लेलले गरेका थिए ।

त्यस अवसरमा बोल्दै उनले अहिलेको समय भनेको सृजनात्मक समय भएको बताउँदै नेतृत्व विकास र बोल्ने कलाले मानिसलाई समाजमा छुट्टै पहिचान दिने बताए । एमाले नेतृत्वले राष्ट्रपति, प्रधानन्यायाधीश, सभामुख, मुख्यसचिव जस्ता पदहरुमा महिलाहरुलाई प्राथमिकता दिइसकेको भन्दै महिला सक्षम हुने हो भने पार्टीले जहिले पनि उचित स्थान र भूमिका दिने बताए ।

एमाले जिल्ला कमिटी रुपन्देहीका सदस्य तेजबहादुर गुरुङले तालिमले ब्यक्तिबाट ब्यक्तित्व बनाउन सहयोग गर्ने भन्दै तीनदिनमा सहभागीहरुले धेरै कुरा सिक्नेमा आफु आशाबादी भएको बताए ।

अनेमसंघ तिलोत्तमा नगर अध्यक्ष कमला ज्ञवालीले तालिमले महिला सशक्तिकरणमा सहयोग पुग्ने बताउदै बोल्ने मात्रै नभएर प्रभावकारी तरिकाले बोल्नु अहिलेको आबश्यकता भएको बताइन् ।

कार्यक्रममा अनेमसंघ तिलोत्तमा–३ की अध्यक्ष दुर्गा बस्याल, सचिव लक्ष्मी अर्याल लगायतले महिलाहरुलाई सक्षम बनाउनका लागि तालिम आयोजना गरिएको बताएका थिए ।

तालिममा लुम्बिनी मिडिया हव प्रालिका प्रमुख प्रकाश गौतम, सञ्चारिका समूह लुम्बिनीकी अध्यक्ष अमृता अनमोल लगायतले सहजीकरण गरिरहेका छन् । तालिममा वडा नं ३ का ४० जना महिलाहरुको सभागिता रहेको छ ।